ඉරානය සහ අමෙරිකාව අතර පවතින යුදමය තත්ත්වය නැවත උත්සන්න වීම සහ හූති කැරලිකරුවන් යේමනයේ වරාය නගරයක් අල්ලා ගැනීම වැනි හේතු සමඟ නැවතත් ලෝක වෙළෙඳපොළේ බොරතෙල් මිල ශීඝ්‍රයෙන් ඉහළ යමින් තිබෙන බව වාර්තා වෙයි.
ඒ අනුව අද (11) උදෑසන වන විට ලෝක වෙළෙඳපොළේ බ්‍රෙන්ට් වර්ගයේ බොරතෙල් බැරලයක මිල අමෙරිකානු ඩොලර් 108 සීමාව ද ඉක්මවා ගොස් ඇත. පසුගිය ජූලි 24 දාට පසුව පසුගිය 9 වැනිදා බ්‍රෙන්ට් බොරතෙල් බැරලයක මිල ඩොලර් 100 සීමාව ඉක්මවා ගිය අතර එදින සිට දිගටම මිල ඉහළ යමින් තිබෙයි.
මෙම මිල ඉහළ යාමට සමගාමීව අමෙරිකානු වෙස්ට් ටෙක්සාස් ඉන්ටර්මීඩියට් බොරතෙල් බැරලයක මිල ද ඩොලර් 103.34 දක්වා ඉහළ ගොස් ඇත. ඊට අමතරව මර්බන් වර්ගයේ බොරතෙල් බැරලයක මිල ඩොලර් 122.48ක් දක්වා ඉහළ ගොස් ඇත.