අධිකරණ පද්ධතිය තුළ දැනට ගොඩගැසී ඇති නඩු කටයුතු ප්‍රමාදයකින් තොරව අවසන් කිරීමේ අරමුණින් විනිසුරුවරුන්ගේ විශ්‍රාම යෑමේ වයස් සීමාව ඉහළ නැංවීමට රජය තීරණය කර ඇති බව කැබිනට් ප්‍රකාශක අමාත්‍ය වෛද්‍ය නලින්ද ජයතිස්ස මහතා පවසයි.
අද (21) පැවැති කැබිනට් තීරණ දැනුම් දීමේ මාධ්‍ය හමුවට එක්වෙමින් අමාත්‍යවරයා පෙන්වා දුන්නේ, මෙම පියවර හරහා නීතිය සහ අධිකරණ පද්ධතිය කෙරෙහි මහජනතාව තබා ඇති විශ්වාසය තවදුරටත් තහවුරු කිරීම රජයේ ප්‍රධාන අපේක්ෂාව බවයි.
නඩු ඉක්මනින් අවසන් කිරීම රජයේ ප්‍රතිපත්ති ප්‍රකාශයට ද ඇතුළත් කර ඇති බව සඳහන් කළ අමාත්‍යවරයා, විනිසුරුවරුන්ගේ විශ්‍රාම වයස දීර්ඝ කිරීම පිළිබඳව මීට පෙර පාර්ලිමේන්තු කමිටුවක් හරහා ද යෝජනා ලබාගෙන තිබූ බව මතක් කර දුන්නේය.
සියලුම අධිකරණ මට්ටම්වල විනිසුරුවරුන්ගේ විශ්‍රාම වයස වැඩි කිරීම සම්බන්ධයෙන් යෝජනා ලැබී ඇති අතර, ඒ පිළිබඳව දැනට සාකච්ඡා පවත්වමින් සිටින බවත්, ඊට අමතරව නව විනිසුරුවරුන් බඳවා ගැනීමට ද කටයුතු යොදමින් සිටින බවත් අමාත්‍ය නලින්ද ජයතිස්ස මහතා වැඩිදුරටත් ප්‍රකාශ කළේය.