රජයේ ව්යාපාරවල ලාභය 17%කින් අඩුවෙලා විදුලි බලයේ පාඩුව – රු. බිලියන 38.7 ශ්රී ලංකන් පාඩුව – රු. බිලියන 23.2
රජයට අයිති ව්යාපාරවල ලාභය 17%කින් අඩුවී ඇති බවත් ශ්රී ලංකා විදුලිබල මණ්ඩලය සහ ශ්රී ලංකන් ගුවන් සේවය ඉහළ පාඩු ලබා ඇති බවත් මහා භාණ්ඩාගාරයේ 2025 අවුරුද්දට අදාළව ප්රකාශයට පත් කර ඇති වාර්ෂික වාර්තාවෙන් හෙළිවෙයි. මෙම වාර්තාවට අනුව 2024 වර්ෂයේදී රජයට අයත් ප්රධාන ව්යාපාර 51ක් වාර්තා කළ රු. බිලියන 539ක ලාභය 2025 වර්ෂයේදී රු.බිලියන 444ක් දක්වා පහළ බැස ඇති අතර ඒ අනුව එම අඩුවීමේ ප්රතිශතය 17%කි. මෙම ආයතන 51 පසුගිය 2023 අවුරුද්දේදී ද රුපියල් බිලියන 445ක ලාභයක් වාර්තා කර ඇති අතර ඒ අනුව 2025 වර්ෂයේ වාර්තාගත ලාභය ඊටත් වඩා අඩු මට්ටමකට පහත බැස ඇත. මෙසේ ලාභ වාර්තා කර ඇති රාජ්ය අංශ අතර මෙරට ක්රියාත්මක රාජ්ය බැංකු පද්ධතිය ප්රධාන වන අතර ඒ අනුව සමස්ත ලාභයෙන් 27%ක අගයක ලාභයක් වාර්තා කර ඇත්තේ ලංකා බැංකුව වන අතර එහි අගය රුපියල් බිලියන 120ක් බව මෙම වාර්තාවෙන් ප්රකාශ වෙයි. මේ අනුව රජයට අයත් බැංකු සහ මූල්ය ආයතන මුළු ලාභයෙන් රුපියල් බිලියන 304කට හිමිකම් කියන අතර එය සමස්තයේ අඳුරු චිත්රය පෙන්වයි. රජයට අයත් ආයතන 527ක් පවතින අතර මෙසේ සංඛ්යා දත්ත ප්රසිද්ධ කර ඇත්තේ ආයතන 51ක වීම රාජ්ය ආයතනවල පාඩුවේ මහා පරිමාණ තත්ත්වය පෙන්වා සිටින බව ආර්ථික විශ්ලේෂකයන්ගේ අදහස වී ඇත. 2024 වර්ෂයේදී රුපියල් බිලියන 141.6ක ලාභයක් පෙන්නූ විදුලිබල මණ්ඩලය 2025 වසරේදී රුපියල් බිලියන 38.7ක පාඩුවක් ලබා ඇත. මේ අතර සුපුරුදු පරිදි ශ්රී ලංකන් ගුවන් සේවයට මහා භාණ්ඩාගාරයෙන් රුපියල් බිලියන 25.3ක ප්රදානයක් ලබාදී තිබියදීත් එහි පාඩුව රුපියල් බිලියන 23.2ක් බව වාර්තාව ප්රකාශයට පත් කර ඇත. මේඝ ගමඇතිරාළ