එක්සත් ජනපදය සහ ඉරානය අතර ඇතිවී තිබෙන මූලික සාම එකඟතාව නිසා සහ ලෝක බොරතෙල් සැපයුමේ කේන්ද්රය වන හෝමූස් සමුද්ර සන්ධිය යළි විවෘත වීමට ඇති බලාපොරොත්තුවත් සමඟ ලෝක වෙළෙඳපොළේ බොරතෙල් මිල ශීඝ්රයෙන් පහළ බසිමින් ඇත.
මෙම නව සාම වටපිටාව සමඟ බ්රෙන්ට් බොරතෙල් බැරලයක් ඇමෙරිකානු ඩොලර් 83ත් 84ත් අතර අගයක් ගෙන ඇති අතර ඩබ්ලිව්.ටී.අයි. බොරතෙල් බැරලයක මිල ඇමෙරිකානු ඩොලර් 80ත් 81.50ත් අතර අගයක් වෙත පහත බැස ඇත.
පසුගිය මැයි මාසයේදී බොරතෙල් බැරලයක සාමාන්ය මිල ඇමෙරිකානු ඩොලර් 100යේ සීමාව ඉක්මවා ගොස් තිබුණු අතර ඒ අනුව ලෝකයේ බොහෝ රටවල තෙල් මිල ඉහළ ගියේය.
මෙම නව තත්ත්වයත් සමඟ පසුගිය අප්රේල් මැද භාගයෙන් පසු පළමු වතාවට එක්සත් ජනපදයේ සාමාන්ය සිල්ලර පෙට්රල් මිල ගැලුමක් සඳහා ඇමෙරිකානු ඩොලර් 4ට වඩා අඩු අගයක් ගෙන ඇතැයි වාර්තා වෙයි.
එළඹෙන ජුනි 19දා පැවැත්වෙන නිල අත්සන් තැබීමේ උත්සවයෙන් පසුව ගිවිසුමේ කරුණු මාධ්ය වෙත නිකුත් කරන බව ඇමෙරිකානු ජනාධිපතිවරයා ප්රකාශ කරන අතර ඔහුගේ ප්රකාශයට අනුව එදිනම හෝමූස් යළි නෞකා ගමනාගමනය සඳහා විවෘත වනු ඇත. එක්සත් ජනපද ජනාධිපතිවරයා කුමක් කීවත් මෙම මුහුදු තීරයේ රඳවා ඇති පුපුරන ද්රව්ය ඉවත් කිරීම ලේසි නැති බව බටහිර මාධ්ය වාර්තා කරයි.
මෙම නව තත්ත්වයත් සමඟ ලෝකයේ බොහෝ රටවලට ඉහළ දමනු ලැබූ ඛනිජ තෙල් මිල පහත හෙළීමට සිදුවනු ඇතැයි කරුණු වාර්තා වුවත්, ලංකාව ඛනිජ තෙල් මිල ලෝක වෙළෙඳපොළේ විශාල වශයෙන් අඩුවුණත් ටික කාලයක් මේ මිල ගණන්ම පවත්වාගෙන යනු ඇතැයි ඛනිජ තෙල් නීතිගත සංස්ථා ආරංචි මාර්ගවලින් ප්රකාශ වෙයි.
