පිල්ලෙයාන්ට ඝාතන 5ක් ගැන චෝදනා…!
නැගෙනහිර පළාතේ හිටපු මහ ඇමති සිවනේෂතුරේ චන්ද්රකාන්තන් හෙවත් පිල්ලෙයාන්ට එරෙහිව සීඅයිඩීය විසින් මනුෂ්ය ඝාතන 5කට අදාළව මඩකලපුව මහේස්ත්රාත් අධිකරණයට පසුගිය 15දා කරුණු වාර්තා කර ඇතැයි දැනගන්නට ලැබේ. 2008 ජනවාරි 09දා මඩකලපුව නගරයේ කෝවිලක් අසලදී පොලිස් නිලධාරියෙක් ඇතුලුව පුද්ගලයන් දෙදෙනෙක් ඝාතනය කිරීම එම වසරේම මැයි 22දා කාත්තන්කූඩි පොලිස් වසමේ ස්ථානයකදී තවත් පුද්ගලයන් දෙදෙනෙක් ඝාතනය කිරීම, එම වසරේම අගෝස්තු මස 20දා මඩකලපුව වව්නතිව් හිදී තවත් පුද්ගලයෙක් වෙඩි තබා ඝාතනය කිරීම පිළිබඳව මෙසේ පිල්ලෙයාන් හට චෝදනා එල්ලවෙයි. මෙම පස් පුද්ගල ඝාතනයට හවුල් පුද්ගලයන් 4 දෙනෙක් දැනටමත් සීඅයිඩීය හඳුනාගෙන ඇති අතර ඒ අතරින් ප්රධාන සැකකරුවා යැයි කියන පුද්ගලයා දැනටමත් රටින් පැනගොස් ඇති බවත් කරුණු වාර්තා වෙයි. මේ අතර මෙම සිද්ධියට අදාළ මුස්ලිම් ජාතිකයන් දෙදෙනෙක් අත්අඩංගුවට ගෙන රක්ෂිත බන්ධනාගාර ගත කර තිබෙන අතර ඊට අමතරව දැනට ලංකාවේ සිටින තුන්වෙන්නා ලෙස පිල්ලෙයාන් හඳුනාගෙන ඒ පිළිබඳව සීඅයිඩීය අධිකරණයට කරුණු වාර්තා කර ඇත. පිල්ලෙයාන් නැගෙනහිර විශ්වවිද්යාලයේ හිටපු උපකුලපති එස්. රවින්ද්රනාත් ඝාතන විමර්ශනයට අදාළව මේ වනවිටත් රක්ෂිත බන්ධනාගාර ගත කර සිටින අතර ඔහු මෙම ඝාතනයන්වලට අදාළව ඊළඟ නඩු දිනයේදී මඩකලපුව මහෙස්ත්රාත් අධිකරණය වෙත ඉදිරිපත් කරන්නැයි වැලිකඩ බන්ධනාගාර අධිකාරීවරයාට මඩකලපුව මහේස්ත්රාත්වරයා නියෝග කර ඇත. කරුණා-පිල්ලෙයාන් කණ්ඩායම එල්ටීටීඊ සංවිධානයෙන් ඉවත්වූ පසුව අතුරු මිලිටරි කණ්ඩායමක් සේ ක්රියාකරමින් දිවයිනේ බොහෝ ප්රදේශවල අනීතික ඝාතන, පැහැර ගැනීම්, අතුරුදන් කිරීම් සහ කප්පන් ගැනීම්වල රාජ්ය අනුග්රහයෙන් නිරතවී ඇති බවට මේ වනවිට තොරතුරු වාර්තා වෙමින් තිබෙයි.