මින් ඉදිරියට අස්වැසුම සුභසාධන ප්රතිලාභ වැඩසටහන යටතේ දීමනා ගෙවනු ලබන්නේ දුප්පත් සහ අන්ත දුප්පත් පවුල් සඳහා පමණක් බව සුභසාධන ප්රතිලාභ මණ්ඩලය නිල වශයෙන් නිවේදනය කර තිබෙන අතර ඒ අනුව මේ වනවිට ලක්ෂ 7කට වැඩි ප්රථිලාභීන් ප්රමානයකට අස්වැසුම අහිමිකර ඇතැයි වාර්තා වෙයි.
2023 වසරේදී ආරම්භ කරන ලද අස්වැසුම වැඩසටහන යටතේ ප්රතිලාභ ලබාගත් ප්රතිලාභීන්ගේ ප්රතිලාභී ලැයිස්තුව 2025 අප්රේල් මාසයේදී වර්ගීකරණය කිරීමෙන් පසු සංක්රාන්තික කාණ්ඩයේ පසුවූ ප්රතිලාභීන් තුන්ලක්ෂ පහළොස්දහසකගේ දීමනා අත්හිටුවීමට පියවර ගැනුණ අතර මෙම වසරේ ජූනි මාසයේදී අවදානමට ලක්වූ කාණ්ඩයේ තවත් ප්රතිලාභීන් හාරලක්ෂ විසිපන්දහසකගේ දීමනා ගෙවීම ද නතර කර ඇත. ඒ අනුව මේ වනවිට ප්රතිලාභීන් ලක්ෂ 7කට වඩා වැඩි පිරිසකට අස්වැසුම ප්රතිලාභ ගෙවීම නතරකර ඇත.
මේ පිළිබඳව මාධ්ය වෙත අදහස් දක්වමින් අස්වැසුම සහකාර කොමසාරිස් අශාන් දර්ශක ප්රකාශ කරන්නේ දීමනා අත්හිටුවන ලද මෙම කාණ්ඩ දෙකට අයත් පවුල්වලට අසාධාරණයක් සිදු නොවන බවය. එහිදී ඔහු වැඩිදුරටත් ප්රකාශ කරන්නේ මෙම කපාදමන ලද පවුල් අතරින් සැබවින්ම දුප්පත් හෝ අන්ත දුප්පත් මට්ටමේ පසුවන බවට හඳුනාගන්නා පවුල් සඳහා, සංශෝධිත නව ක්රමවේදය යටතේ නැවත සහනාධාර ලබා ගැනීමට සුදුසුකම් ලැබීමේ යම් අවස්ථාවක් පැවතිය හැකි බවය.
