පාස්කු ඉරිදා ත්රස්ත ප්රහාරයට සම්බන්ධ කණ්ඩායමේ ආධ්යාත්මික නායකයා යැයි සැලකෙන නවුෆර් මවුලවි අපරාධ පරීක්ෂණ දෙපාර්තමේන්තුව හමුවේ කර ඇති පාපොච්චාරණය ස්වේච්ඡාවෙන් ලබාදුන් එකක් බවට කොළඹ ස්ථිර ත්රිපුද්ගල මහාධිකරණය තීන්දු කර ඇත.
මහාධිකරණ විනිසුරුවන් වන රාමනාදන් කන්නන්, සුජීව නිශ්ශංක යන මහත්වරුන්ගේ එකඟත්වය ඇතිව සභාපති විනිසුරු නවරත්න මාරසිංහ පසුගිය 23දා මේ නියෝගය ලබාදී ඇත්තේ, ‘වෝයර් ඩයර්’ සත්යතා පරීක්ෂණයක් පැවැත්වීමෙන් අනතුරුව වන අතර ඒ අනුව මෙම තීරණයත් සමඟ පාස්කු ඉරිදා ප්රහාරයට සම්බන්ධ තැනැත්තන් හා සැලසුම් කළ ආකාරය පිළිබඳ වැදගත් තොරතුරු රැසක් එහි සඳහන් තැනැත්තන්ට එරෙහිව සාක්ෂියක් ලෙස ඉදිරිපත් කිරීමට හැකියාව ලැබී ඇත.
නවුෆර් මවුලවි අපරාධ පරීක්ෂණ දෙපාර්තමේන්තුවේ මූලස්ථානයේදී සහකාර පොලිස් අධිකාරී විජිත පෙරේරා හමුවේ 2019 වසරේ නොවැම්බර් 11දා මෙම කටඋත්තරය ලබාදී ඇති අතර ඒ අනුව පාස්කු ඉරිදා ත්රස්ත ප්රහාරය සම්බන්ධයෙන් විත්තිකරුවන් 24 දෙනෙකුට එරෙහිව විභාග වන මහ නඩුවට මෙම සාක්ෂි අදාළ කරගනු ඇත.
ඒ අනුව මේ වනවිට මෙම නඩුවේ විත්තිකරුවන් සිව්දෙනකුගේ පාපොච්චාරණ ස්වේච්ඡාවෙන් දී ඇති බව ඉහත සත්යතා පරීක්ෂණය හමුවේ අනාවරණය වී ඇතැයි දැනගන්නට ලැබෙන අතර 8 වැනි විත්තිකරුගේ පාපොච්චාරණය ස්වේච්ඡාවෙන් දී නොමැති බවත් තහවුරු කර ඇති අතර පළමුවැනි විත්තිකරු මුහම්මදු ඊබ්රහිම් මොහොමඩ් නවුෆර් හෙවත් අබු සෙයිද් හෙවත් අබු සරීම් හෙවත් නවුෆර් මවුලවි, 11 වැනි විත්තිකරු වන කාලිබ් සමීර්, 4 වැනි විත්තිකරු වන මොහොමඩ් ඊබ්රහිම් සාදික් අබ්දුල්ලා, 9 වැනි විත්තිකරු වන මොහොමඩ් රමීෂ් මොහොමඩ් සාජිත් යන අයගේ පාපොච්චාරණයන් අධිකරණය ස්වේච්ඡා පාපොච්චාරණයන් බවට තහවුරු කරගෙන ඇත.
