ශ්රී ලංකා ආණ්ඩුක්රම ව්යවස්ථාවේ 107 වෙනි වගන්තිය සංශෝධනය කිරීම සඳහා 22 වෙනි ව්යවස්ථා සංශෝධනයක් ගෙන එන්නට අවශ්ය කටයුතු ඉක්මනින් සිදුවෙමින් ඇතැයි ආණ්ඩුවේ අභ්යන්තර ආරංචි මාර්ගවලින් මෙන්ම නීති ප්රජාව දෙසින් එන ආරංචි මාර්ගයන් වලින්ද දැනගන්නට ලැබේ.
ශ්රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ විශ්රාමික වයස සංශෝධනය කිරීම මෙම නව ව්යවස්ථා සංශෝධනයේ අරමුණ වෙන අතර ඒ අනුව දැනට ශ්රේෂ්ඨාධිකරණ විනිසුරු විශ්රාම වයස් සීමාව අවුරුදු 65 සිට 67ක් දක්වා දීර්ඝ කිරීමටත් අභියාචනාධිකරණ විනිසුරු විශ්රාම වයස් සීමාව අවුරුදු 63 සිට 65 දක්වා දීර්ඝ කිරීමත් මෙමගින් සිදුවෙනු ඇති බව වාර්තා වෙයි.
1978 ගෙන එන ලද වර්තමාන ව්යවස්ථාව මේ වනවිට 21 වතාවක් සංශෝධනයන්වලට ලක්කර ඇතැයි ද එයින් 16 වතාවක්ම ව්යවස්ථාව සංශෝධනය කර ඇත්තේ රාජ්ය නායකයාගේ පුද්ගල අභිලාෂයන් මුදුන් පමුණුවා ගන්නට බවද ප්රකාශ කරන අනිද්දා ඩිජිටල් හි ප්රධාන සංස්කාරක සහ නීතිඥ කේ ඩබ්ලිව් ජනරංජන වැඩිදුරටත් ප්රකාශ කරන්නේ මෙම සංශෝධනයේ අරමුණ ලබන දෙසැම්බරයේ විශ්රාමය යන්නට ඉන්න වර්තමාන අගවිනිසුරු ප්රීති පද්මන් සූරසේනගේ ධුර කාලය තව අවුරුදු දෙකකින් දීර්ඝ කරගැනීම බවයි.
ආණ්ඩුවේ සහ ජනාධිපතිවරයාගේ මෙම උත්සාහය පිළිබඳව ශ්රී ලංකා නීතිඥ සංගමය සිය කනස්සල්ල පළ කර තිබෙන අතර කොළඹ මහාධිකරණ නීතිඥ සංගමය, කොළඹ මහේස්ත්රාත් අධිකරණ නීතිඥ සංගමය, බදුල්ල නීතිඥ සංගමය ආදී නීතිඥ සංගම් ද සිය විරෝධය පළ කර ඇති අතර පොදු රාජ්ය මණ්ඩලීය නීතිඥ සංගමයද ජනාධිපතිවරයා වෙත සිය විරෝධය පළකර ඇත. මේ පිළිබඳව නිවේදනයක් නිකුත් කරන විකල්ප ප්රතිපත්ති කේන්ද්රය ප්රකාශ කර ඇත්තේ යම් හෙයකින් මෙම සංශෝධනය සම්මත කරගන්නට වර්තමාන රජය කටයුතු කළහොත් එය වැරදි පූර්වාදර්ශයක් වෙනු ඇති බවයි. එමෙන්ම එය අධිකරණයේ පාලනයට සහ ස්වාධීනත්වයට මරු පහරක් වෙනු ඇති බවත් ඔවුන් අවධාරණය කරයි.
මෙම විරෝධතා පැවතියත් තුනෙන් දෙකක බලයක් හිමි ආණ්ඩුව මෙම නව ව්යවස්ථා සංශෝධනය ඉතා ඉක්මනින් පාර්ලිමේන්තුවට ගෙන එමින් එය සම්මත කරගැනීම සඳහා කටයුතු කරමින් ඇතැයි වාර්තා වෙයි.
