මහජන ආරක්ෂක අමාත්ය ආනන්ද විජේපාල මහතාගේ පාර්ලිමේන්තු මන්ත්රී ධුරය අභියෝගයට ලක් කර ඉදිරිපත් වූ පෙත්සම ප්රතික්ෂේප කරමින් අභියාචනාධිකරණය දුන් තීන්දුවකට එරෙහිව ගොනුකළ අභියාචනයක් විභාග කිරීම සඳහා ශ්රේෂ්ඨාධිකරණය ඊයේ (22) අවසර ලබා දුන්නේය.
ජනක් ද සිල්වා, මේනකා විජේසුන්දර සහ සම්පත් විජේරත්න යන විනිසුරුවරුන්ගෙන් සමන්විත විනිසුරු මඩුල්ලක් හමුවේ මෙම නියෝගය නිකුත් කෙරුණි.
ශ්රී ලංකා පොදුජන පෙරමුණේ ක්රියාකාරිකයෙකු වන රේණුක දුෂ්යන්ත පෙරේරා විසින් මෙම අභියාචනය ගොනු කර ඇත. ඔහු පෙන්වා දෙන්නේ ආනන්ද විජේපාල මහතා මන්ත්රීවරයෙකු ලෙස කටයුතු කරන අතරතුරදීම, ජනාධිපතිවරයාගේ කාර්ය මණ්ඩල ප්රධානී තනතුරට ද පත් කර ඇති බවයි.
පෙත්සම්කරුගේ තර්කය වන්නේ එම තනතුර දැරීම හරහා ඔහු රාජ්ය නිලධාරියෙකු බවට පත්වන බැවින්, ආණ්ඩුක්රම ව්යවස්ථාවට අනුව ඔහුට මන්ත්රී ධුරයේ රැඳී සිටීමට හෝ පාර්ලිමේන්තු ඡන්ද විමසීම්වලට සහභාගී වීමට නීතිමය සුදුසුකමක් නොමැති බවයි.
මීට පෙර මෙම ඉල්ලීම ඇතුළත් රිට් පෙත්සම පසුගිය 2025 මැයි 7 වැනිදා අභියාචනාධිකරණය විසින් ප්රතික්ෂේප කර තිබුණි. එහිදී නීතිපතිවරයා මතු කළ මූලික විරෝධතාවයක් පිළිගනිමින් අභියාචනාධිකරණය සඳහන් කළේ නඩුවට අදාළ අත්යවශ්ය පාර්ශ්වයන් වගඋත්තරකරුවන් ලෙස නම් කිරීමට පෙත්සම්කරු අපොහොසත් වී ඇති බවයි.
කෙසේ වෙතත්, අභියාචනාධිකරණයේ එම තීන්දුව නිවැරදි නොවන බව පවසමින් පෙත්සම්කරු ශ්රේෂ්ඨාධිකරණය හමුවට පැමිණි අතර, කරුණු සලකා බැලූ උත්තරීතර අධිකරණය මේ පිළිබඳව දීර්ඝ ලෙස විභාග කිරීමට තීරණය කර ඇත.
මෙම නඩු වාරයේදී පෙත්සම්කරු වෙනුවෙන් නීතිඥ විශ්ව විමුක්ති පෙනී සිටි අතර, අමාත්ය ආනන්ද විජේපාල මහතා වෙනුවෙන් ජනාධිපති නීතිඥ ජෙෆ්රි අලගරත්නම් පෙනී සිටියේය.
