රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේ විසින් ගොනු කර ඇති රිට් පෙත්සමට තමන්වද ඇතුළත් කරගන්නා ලෙස ඉල්ලමින් තවත් පිරිසක් අභියාචනාධිකරණයට පෙත්සම් ඉදිරිපත් කර ඇත.
ආචාර්ය ගුණදාස අමරසේකර, පූජ්‍ය බෙංගමුවේ නාලක හිමි, පූජ්‍ය දාපනේ සුමනවංශ හිමි, දිඹුලාගල රාහුලාලංකාර හිමි, ජ්‍යෙෂ්ඨ වෛද්‍ය උපදේශක වෛද්‍ය ශකුන්තලා සෙනෙවිරත්න සහ ගෝලීය ශ්‍රී ලාංකීය සංසදය එම පෙත්සම්කරුවෝ වෙති.
රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේ අභියාචනාධිකරණයට රිට් පෙත්සමක් ගොනු කර ඇත්තේ තමන්ව අත්අඩංගුවට ගැනීම සහ රඳවා තබාගැනීම නීතිවිරෝධී බව පවසමිනි.
එමෙන්ම, මෙම නඩුවේ වගඋත්තරකාර පාර්ශවයන් ලෙස පෙත්සම්කරුවන් පෙන්වා දෙන්නේ පාස්කු බෝම්බ ප්‍රහාරයේ වගකීම ඇත්තේ සහරාන් හෂීම් සහ ඔහුගේ කණ්ඩායමට පමණක් බවයි. ඊට සුරේෂ් සලේ සම්බන්ධ නැති බව නිල විමර්ශනවල දී තහවුරු වී ඇතැයි ඔවුහු පවසති.
එසේම චැනල් 4 නාලිකාවේ චෝදනා විශ්වාස කළ නොහැකි බවත්, ප්‍රහාරය සිදුවන කාලයේ සලේ ලංකාවේ නොසිටි බවත් ඔවුහු සඳහන් කරති. මීට පෙර ශ්‍රේෂ්ඨාධිකරණය දුන් පාස්කු නඩු තීන්දුවෙන් ද සුරේෂ් සලේට කිසිදු චෝදනාවක් එල්ල කර නැති බව මෙම පිරිස වැඩිදුරටත් පෙන්වා දෙති.
