පල්ලේගම හේමරතන භික්ෂුව විසින් බාලවයස්කාර දැරියක බරපතළ ලෙස අපයෝජනයට ලක්කිරීමේ සිදුවීම පිළිබඳව සාකච්ඡා කළ පාර්ලිමේන්තු මන්ත්‍රීවරියන්ගේ සාකච්ඡාව පිළිබඳව සාවද්‍ය තොරතුරු වාර්තා කළේ යැයි කියමින් බීබීසී සිංහල වෙබ් අඩවියේ සංස්කාරකවරිය සහ එහි මාධ්‍යවේදීන් කිහිපදෙනෙක් හට අනිද්දා (23) දිනයේදී පාර්ලිමේන්තුවේ වරප්‍රසාද කමිටුව හමුවේ පෙනී සිටින්නැයි දන්වා ඇතැයි KNEWS වෙත වාර්තා වෙයි.
පාර්ලිමේන්තු මන්ත්‍රී ලක්මාලි හේමචන්ද්‍ර ගේ පැමිණිල්ලක් මත මෙම කැඳවීම සිදුකර ඇතැයි වාර්තා වෙන අතර මෙය නිදහස් මාධ්‍ය වෙත එල්ල කළ තර්ජනයක් බව අප වෙබ් අඩවියේ විශ්වාසය යි.
පාර්ලිමේන්තු කාරකසභාවක් නොවෙන මන්ත්‍රී සංසදයක සිදුවීමක් අල්ලාගෙන ආණ්ඩුව තමන්ගේ පාර්ලිමේන්තු බලය මෙසේ මාධ්‍යට එරෙහිව සහ තොරතුරු දැනගැනීමේ අයිතියට එරෙහිව භාවිතා කිරීම පිළිකුල්සහගත බව කිව යුතු ය.
එවක අටමස්ථානාධිපති භික්ෂුව විසින් සිදු කළා යැයි කියවෙන මෙම ළමා අපයෝජන සිදුවීම පිළිබඳව පොලීසිය නීතිය ක්‍රියාත්මක කිරීම එන්න එන්නම පමාකරන පසුබිමක සහ ආණ්ඩුව නීතිය නැමීම සඳහා ආධාර අනුබල දෙමින් සිටින පසුබිමක, ඊට විරුද්ධව විශාල ජනහඬක් නැඟුණු අතර ඒ කාලයේ පෙනෙන්නවත් නොසිටි පාර්ලිමේන්තු කාන්තා මන්ත්‍රී සංසදය මෙසේ ජනතාවගේ තොරතුරු දැනගැනීමේ අයිතියට වැට බඳින්නට පාර්ලිමේන්තු වරප්‍රසාද භාවිතා කිරීම හෙළාදැකිය යුතුය.
මෙම කමිටුව නියෝජනය කරන අජිත් පී පෙරේරා ප්‍රමුඛ විපක්ෂ මන්ත්‍රීවරුන්, ලක්මාලි හේමචන්ද්‍ර මන්ත්‍රීවරියගේ මෙම පැමිණිල්ල සම්බන්ධව කුමන තීරණයක් ගනු ඇත් දැයි විමසිලිමත්ව සිටීම විපක්ෂ ක්‍රියාකාරීන්ට වැදගත් වෙනු ඇත.
