තෙල් මිල අඩු කළ යුතුද නැද්ද යන්න කෙරෙහි ආණ්ඩුව තුළ මත ගැටුමක් නිර්මානය වී ඇතැයි ද එක් පිරිසක් වහාම තෙල් මිල අඩුකර ජනතාවට ලෝක වෙළඳපොළේ තෙල් මිල පහළ යෑමේ වාසිය ලබාදිය යුතු යැයි ද තවත් පිරිසක් මෙම මිල මට්ටම මෙලෙසම තව මාස 3ක්වත් පවත්වාගෙන යා යුතු යැයිද කියා සිටින බව වාර්තා වෙයි.
මේ අතර සමගි ඒකාබද්ධ වෘත්තීය සමිති කැඳවුම්කරු ආනන්ද පාලිත, සංඛ්යා දත්ත සමඟ ප්රකාශ කරන්නේ මෙම නව තත්ත්වයත් සමඟ රජයට අවශ්ය නම් ඩීසල් ලීටරය රුපියල් 150කින් ද පෙට්රල් ලීටරය රුපියල් 120කින්ද අඩු කළ හැකි තත්ත්වයක් ලෝක වෙළඳපොළේ තෙල් මිල පහළ යෑමත් සමඟ නිර්මානය වී ඇති බවය.
එහෙත් පසුගිය කාලයේ ආණ්ඩුව ආසියාවේ කිසිම ආණ්ඩුවක් නොකරන ආකාරයට ඉතාමත් ඉහළ මිලකට පිරිපහදු කරන ලද තෙල් හදිස්සි තත්ත්ව යටතේ යැයි කියමින් මිලදී ගැනීම නිසා සිදුව ඇති පාඩුව පියවා ගැනීම සඳහා මේ මොහොතේ තෙල් මිල පහළ දමනු ඇතැයි සිතිය නොහැකි බවය.
ඇමරිකාව සහ ඉරානය අතර ස්ථිර සටන් විරාමයක් ඇතිවීම සහ හෝමූස් සමුද්ර සන්දිය ආශ්රිත නෞකා ගමනාගමනය නැවත ආරම්භ වීම යන හේතු නිසා ලෝක වෙළඳපොළේ තෙල් මිල ශීඝ්රයෙන් පහත වැටෙමින් පවතින අතර පසුගිය 18දා වනවිට Brent බොරතෙල් බැරලයක මිල ඩොලර් 77 දක්වා පහත වැටී තිබුණි. මෙම තත්ත්වය සමඟ ආර්ථික විශ්ලේෂකයන් ප්රකාශ කරන්නේ පෙට්රල් 92 රුපියල් 15-30ත් අතර ප්රමානයකින් ද ඔටෝ ඩීසල් රුපියල් 10-25ත් අතර ප්රමානයකින් ද පෙට්රල් 95 රුපියල් 20-35ත් අතර ප්රමානයකින් ද සුපර් ඩීසල් රුපියල් 15-30ත් අතර ප්රමානයකින් ද මිල අඩු කළ හැකි බවය.
2026 පෙබරවාරි මාසයෙන් පසු මැද පෙරදිග ගැටුම් හේතුවෙන් ලෝක තෙල් වෙළඳපොළේ තෙල් බැරලයක මිල ඉහළ යාමත් සමඟ ශ්රී ලංකාවේ ඉන්ධන මිල කිහිප වතාවක් සංශෝධනය කළ අතර මාර්තු සිට මැයි අවසානය දක්වා පමණක් ඔක්ටේන් 92 පෙට්රල් ලීටරයක මිල රු. 398 සිට රු. 434 දක්වාත්, ඔටෝ ඩීසල් රු. 382 සිට රු. 407 දක්වාත් ඉහළ දමන්නට කටයුතු කළේය. ගෝලීය බොරතෙල් මිල ඉහළ යාම, ආනයන වියදම් වැඩිවීම සහ පිරිවැය අනුව මිල නියම කිරීමේ ප්රතිපත්තිය මෙම මිල සංශෝධනවලට ප්රධාන හේතු ලෙස ආණ්ඩුව ප්රකාශ කරයි.
ජාත්යන්තර මූල්ය අරමුදලේ 5 සහ 6 සමාලෝචනවලදී ආණ්ඩුව තෙල් මිල ඉහළ දමන්නට සහ පිරිවැය අනුව මිල නියමකරන්නට එකඟවී ඇති අතර එම එකඟතාවයද මෙම මිල පහත දමනවාද නැද්ද යන්න තීරණය කිරීමේදී ඊට බලපානු ඇති බව ප්රකාශ වෙයි.
