මැදපෙරදිග යුද තත්ත්වයත් සමග ගෝලීය තෙල් වෙළඳපොළේ බොරතෙල් සහ පිරිපහදු කරන ලද තෙල්වල මිලගණන් ඉතා ඉක්මනින් ඉහළ යමින් තිබෙන පසුබිම තුළ සහ දැනට පවතින වියලි කාලගුණ තත්ත්වය වැනි හේතු නිසා නැවතත් ඉන්ධන අර්බුදයක පෙරනිමිති පහළ වී ඇතැයි ද ඒ අනුව මෙම නව අර්බුදකාරී තත්ත්වය පිළිබඳව ඉක්මනින් සාකච්ඡාවක් ලබාදෙන්න යැයි ජනාධිපතිවරයාගෙන් ඉල්ලා ඇති බවද ලංකා ඛනිජ තෙල් නීතිගත සංස්ථාවේ ප්රකාශකයෙක් පැවසීය.
මේ වනවිට ලෝක වෙළඳපොළේ තෙල් මිල, ඩීසල් 45%කින් ද පෙට්රල් 30%කින් ලෙස ජූලි මාසයේ මුල් සතියේ පැවති මිලට වඩා ඉහළ ගොස් ඇති අතර බොරතෙල් මිලද විශාල වශයෙන් ඉහළ ගොස් ඇත.
පවතින වියලි කාලගුණ තත්ත්වය නිසා ජල විදුලිය සීමිත බව වාර්තා වෙන අතර ගල්අඟුරු අර්බුදය නිසා නොරොච්චෝලේ බලාගාරය එහි උපරීම ධාරිතාවයෙන් ක්රියාත්මක කර ගැනීමේ ප්රශ්නයක් ද උද්ගතව ඇත. මෙම තත්ත්වය නිසා ඩීසල් දහනය කරමින් විදුලිය වැඩි වශයෙන් නිපදවන්නට සිදුව ඇතැයි පැවසෙන අතර මෙම තත්ත්වය තුළ ජනතාව ඉන්ධන පරිභෝජනය සීමා නොකළහොත් අර්බුදය උත්සන්න විය හැකි බව ද වාර්තා වෙයි.
මැදපෙරදිග යුද තත්ත්වයට විසඳුමක් පෙනෙන මානයකවත් නැති තත්ත්වය තුළ සහ මෙම වියලි කාලගුණ තත්ත්වය ඉදිරියේදී නියඟයකට හැරේවි යැයි අනතුරු ඇඟවීම් කෙරෙන පසුබිමක ඉන්ධන අර්බුදය උග්රවිය හැකි යැයිද එනිසා ඉක්මන් ක්රියාමාර්ග නොගතහොත් තෙල් පෝලිම් ඇතිවෙනු ඇති බවද එනිසාම ඉක්මනින් ජනාධිපතිවරයා හමුවී මේ පිළිබඳව සාකච්ඡා කරන්නට එම සංස්ථාව අදහස් කරන බව ද ප්රකාශ වෙයි.
