බොදු බල සේනා සංවිධානයේ ලේකම් පූජ්‍ය ගලගොඩඅත්තේ ඥානසාර හිමියන්ට කොළඹ මහේස්ත්‍රාත් අධිකරණය විසින් පනවා තිබූ සිර දඬුවම එලෙසම ක්‍රියාත්මක කිරීමට කොළඹ මහාධිකරණය අද (23) තීන්දු කළේය.
සිර දඬුවම අවලංගු කර, නිදොස් කොට නිදහස් කරන ලෙස ඉල්ලා ඥානසාර හිමියන් විසින් ඉදිරිපත් කර තිබූ අභියාචනය සලකා බැලීමෙන් අනතුරුව කොළඹ මහාධිකරණ විනිසුරු මංජුල තිලකරත්න මහතා විසින් මෙම නියෝගය ප්‍රකාශයට පත් කරන ලදි.
ඉස්ලාම් දහමට සහ මුස්ලිම් ප්‍රජාවට අපහාස වන අයුරින් ප්‍රසිද්ධ ප්‍රකාශයක් සිදු කිරීම නිසා රටේ ආගමික හා සමාජයීය සංහිඳියාව උල්ලංඝනය වන බව පෙන්වා දෙමින් මෙම නඩු කටයුත්ත ගොනු කර තිබිණි.
අදාළ චෝදනා සම්බන්ධයෙන් කොළඹ මහේස්ත්‍රාත් අධිකරණය හමුවේ පැවැති නඩු විභාගයකින් පසු උන්වහන්සේ වරදකරු බව තීරණය කෙරුණු අතර, මහාධිකරණය අද දුන් තීන්දුවත් සමඟ එකී දඬුවම නොවෙනස්ව ක්‍රියාත්මක වනු ඇත.
