ටිරාන් අලස් අමාත්ය ධුරය දරණ සමයේ සිදුවුණ මාර්ගගත වීසා සහ විදෙස් ගමන් බලපත්ර (e-Passport) අයදුම් කිරීමේ සේවා බාහිර පාර්ශ්වයකට ලබාදීම ගැන රජයේ මුදල් පිළිබඳ කාරක සභාවේ (කෝෆ්) වාර්තාව පසුගිය 12 වෙනිදා එම කමිටුවේ සභාපති ආචාර්ය හර්ෂ ද සිල්වා විසින් පාර්ලිමේන්තුවට ඉදිරිපත් කෙරිණි.
එහිදී සභාව අමතමින් විවිධ අභියෝග සහ විරෝධතා මධ්යයේ මෙම වාර්තාව ඉදිරිපත් කරන බව ප්රකාශ කළ සභාපතිවරයා තම විරෝධය නොතකා පාර්ලිමේන්තු මහලේකම්වරිය කාරක සභාවට කැඳවූ බවත්, ඒ සම්බන්ධයෙන් තමා දැඩි සමච්චලයටද ලක්වූ බවත් පැවසීය.
වාර්තාවේ සඳහන් පරිදි, වීසා අයදුම්පත් මාර්ගගතව භාරගැනීම සඳහා බලයලත් නියෝජිතයන් ලෙස GBS Technology Services සහ IVS Global-FZCO සමාගම්ද, තාක්ෂණික සහකරු ලෙස VF Worldwide Holdings Limited සමාගමද කටයුතු කර ඇත.
COPF කාරක සභාව පෙන්වා දෙන්නේ මෙම සේවා සැපයුම්කරුවන් තෝරාගැනීමේදී තරගකාරී ප්රසම්පාදන ක්රියාවලියක් අනුගමනය නොකිරීම නිසා රජයට මුදලට වටිනාම සේවාව ලබාගැනීම අඩාල වී ඇති බවයි.
මෙහිදී කාරක සභාව අනාවරණය කළේ, සේවා ගාස්තු සහ පහසුකම් ගාස්තු පිළිබඳ විනිවිදභාවයක් නොමැති වීම, දත්ත ආරක්ෂාව හා දත්ත කඩවීම් පිළිබඳ බරපතළ අවදානම් සහ ඒවා පිළිබඳ වැඩිදුර විමර්ශනයක අවශ්යතාව, සමාගම්වලට ලබාදී ඇති සුවිශේෂී බලතල හේතුවෙන් තරගකාරීත්වයට බාධා ඇතිවීම, ඇමෙරිකානු ඩොලර් මිලියන 200ක පමණ වාර්තාගත අරමුදල් ආයෝජනය නොවී පැවතීම සහ ඒ සම්බන්ධයෙන් පැහැදිලි කිරීමක් නොමැති වීම ආදී කරුණු බරපතළ බවයි.
මෙම තත්ත්වය සැලකිල්ලට ගනිමින්, සමස්ත ප්රසම්පාදන ක්රියාවලිය පිළිබඳ පුළුල් වෝහාරික විගණනයක් කඩිනමින් අවසන් කරන ලෙස විගණකාධිපතිවරයාට එම කාරක සභාව නිර්දේශ කරන අතර එම විගණනයේ ප්රතිඵල මත අදාළ බාහිර සේවා ගිවිසුම අවලංගු කිරීම හෝ එහි වගන්ති සංශෝධනය කිරීම ඇතුළු ක්රියාමාර්ග සලකා බැලිය යුතු බවද ප්රකාශ කරයි.
තවද KPMG වාර්තාවද සමාලෝචනය කර, වීසා සහ ඉලෙක්ට්රොනික ගමන් බලපත්ර පද්ධති හරහා හසුරුවන සියලු දත්තවල ආරක්ෂාව සහතික කිරීම සඳහා මහජන ආරක්ෂක අමාත්යාංශය, ආගමන හා විගමන දෙපාර්තමේන්තුව සහ ශ්රී ලංකා දත්ත ආරක්ෂණ අධිකාරිය කඩිනම් හා තීරණාත්මක පියවර ගත යුතු බව COPF කාරක සභාව සිය නිර්දේශ හරහා අවධාරණය කරයි.
මීට අදාළ අපගේ පෙර ලිපි – https://knews.lk/tiran-alles-e-visa-scandal-exposed-knews-investigations/
