බදුල්ල මහාධිකරණය විසින් එම දිස්ත්‍රික්කයේ සමගි ජන බලවේගයේ (සජබ) පාර්ලිමේන්තු මන්ත්‍රී චමින්ද විජේසිරි මහතාට වසර එකහමාරක සිර දඬුවමක් නියම කර තිබෙන බව වාර්තා වෙයි.
පසුගිය 2019 පෙබරවාරි 10 වැනිදා හෝ ඊට ආසන්න දිනකදී එම මන්ත්‍රීවරයා ඇතුළු පිරිසක් ජීප් රථයකින් බණ්ඩාරවෙල නගරයේ ගමන් කරමින් සිටියදී එහි වටරවුමක් අසලදී පොලිස් ජීප් රථයක් විසින් ඔවුන්ගේ රථය ඉස්සර කර යාමේදී ඇති වූ බව කියන බහින්බස් වීමක් මෙම සිද්ධියට පාදක වී ඇත.
මේ පිළිබඳව පොලිසිය සිදු කළ විමර්ශනයෙන් අනතුරුව, පොලිස් නිලධාරීන් දෙදෙනෙකුට තර්ජනය කිරීම, පහර දීම, අයුතු අවහිරය සිදු කිරීම ඇතුළු චෝදනා සම්බන්ධයෙන් එම පාර්ලිමේන්තු මන්ත්‍රීවරයාට, ඔහුගේ රියදුරුට සහ ඇමති ආරක්ෂක අංශයේ පොලිස් නිලධාරියෙකුට එරෙහිව බදුල්ල මහාධිකරණයේ නඩු පවරනු ලැබිණි.
එම නඩුව විභාග කළ බදුල්ල මහාධිකරණ විනිසුරු ජෙයරාම් ට්‍රොට්ස්කි මහතා විසින් එම පාර්ලිමේන්තු මන්ත්‍රීවරයා සහ එවකට ඔහුගේ රියදුරු ලෙස කටයුතු කළේ යැයි කියන බන්දුල රත්නායක යන විත්තිකරුවන් දෙදෙනා චෝදනා හතරකටත්, ඇමති ආරක්ෂක සේවයේ පොලිස් නිලධාරී රසික කරුණාතිලක චෝදනා තුනකටත් වරදකරුවන් බවට තීරණය කර ඇත.
ඒ අනුව මන්ත්‍රීවරයාට මෙම දඬුවම මහාධිකරණය විසින් ලබා දී ඇති අතර, එවකට රියදුරු ලෙස කටයුතු කළ බන්දුල රත්නායක මේ වන විට මිය ගොස් ඇති බව ද අනාවරණය වේ.
