මෙරට සතු මුදල් රුපියල් බිලියන 340ක් වාණිජ බැංකු 13ක් හරහා බැංකු ගිණුම් 227ක් භාවිතයෙන් වසර දෙකක කාලයක් තුළ වංචනිකව රටින් පිටකළේ කෙසේදැයි ශ්රී ලංකා මහ බැංකුව ආදී මීට වගකිව යුතු ආයතන කෝප් කමිටුව වෙත ගෙන්වා ප්රශ්න කළ යුතු යැයි ඉල්ලා සිටිමින් හිටපු මුදල් අමාත්ය පාර්ලිමේන්තු මන්ත්රී රවී කරුණානායක පසුගිය දා රාජ්ය ගිණුම් කාරක සභාවේ සභාපති ආචාර්ය හර්ෂ ද සිල්වා වෙත ලිපියක් යොමුකළ අතර එම ඉල්ලීමට එකඟ වෙමින් ලබන සතියේ දිනෙක මහ බැංකුව ආදී අදාළ ආයතන, මේ පිළිබඳව විමසීමට පාර්ලිමේන්තුව වෙත කැඳවනු ඇතැයි වාර්තා වෙයි.
මහ බැංකුවේ බැංකු අධීක්ෂණ දෙපාර්තමේන්තුව සහ මූල්ය බුද්ධි ඒකකය හට බැංකු පද්ධතිය නිරීක්ෂණය කිරීම, අවදානම් හඳුනා ගැනීම සහ ජාත්යන්තර මුදල් ප්රවාහයන් අධීක්ෂණය කිරීමට පුළුල් නීතිමය බලතල තිබෙන තත්ත්වයක් තුළ, වසර දෙකක කාලයක් තුළ රුපියල් බිලියන 340ක් මෙසේ රටෙන් පිටවුණේ කෙසේද සහ එය හඳුනාගැනීමට මහ බැංකුවට නොහැකිවීම ව්යුහාත්මකව පිළිගත නොහැකි බව මෙම ලිපිය මගින් ප්රකාශ කරන හිටපු මුදල් අමාත්යවරයා, මෙය අතිශය බරපතළ ප්රශ්නයක් බවත් එමගින් ශ්රී ලංකා මහ බැංකුවේ අධීක්ෂණ අසාර්ථකත්වය පෙන්වන බවත් ප්රකාශ කරයි.
ශ්රී ලංකා මහ බැංකු අධිපතිවරයා සහ ජ්යෙෂ්ඨ නිලධාරීන්, ආනයන හා අපනයන පාලක ජනරාල්වරයා, ශ්රී ලංකා රේගු අධ්යක්ෂ ජනරාල්වරයා සහ මෙම සිද්ධියට අදාළ වාණිජ බැංකු 13හි ප්රධාන අනුකූලතා නිලධාරීන් මෙන්ම කෝෆ් කමිටුවෙහි බලතල යටතේ අවශ්ය යැයි සැලකෙන වෙනත් රාජ්ය හෝ නීතිය ක්රියාත්මක කිරීමේ ආයතන ප්රධානීන්, මුදල් කමිටුව වෙත ගෙන්වා මේ පිළිබඳව වහාම ප්රශ්න කළ යුතු යැයි මුදල් කමිටුවේ සභාපතිවරයාට යවනු ලැබූ ලිපිය මඟින් හිටපු මුදල් අමාත්යවරයා අවධාරණය කර ඇත.
