සතුන්ට හිංසා කළ බවට අධිකරණ ක්‍රියාවලියක් තුළ සනාථ වන්නේ නම්, එම පුද්ගලයාට රුපියල් 250,000 දක්වා දඩයක් හෝ වසර දෙකක් දක්වා සිර දඬුවම් ද, එසේ නොමැති නම් මෙම දඬුවම් දෙකම ලබාදිය හැකි නව නීතියක් ගෙන ඒමට ආණ්ඩුව ක්‍රියා කරමින් ඇතැයි වාර්තා වෙයි.
ඉදිරි කාලයේදී පාර්ලිමේන්තුවට ඉදිරිපත් කිරීමට නියමිත මෙම නීති සංශෝධනය මේ වන විට ගැසට් මගින් ප්‍රකාශයට පත් කර ඇති අතර, ඒ අනුව මෙම නව නීති සම්මත වන්නේ නම් ඒ මගින් සියවසක් පැරණි සත්ව හිංසනය වැළැක්වීමේ ආඥාපනත වෙනුවට කෲරත්වය වැළැක්වීම සහ සත්ව සුබසාධනය වැඩිදියුණු කිරීම අරමුණු කරගත් නීතිමය රාමුවක් සකස් වනු ඇත.
මෙම නව නීති සංශෝධනය යටතේ සතුන්ට පහර දීම, වධහිංසා පැමිණවීම, අධික ලෙස බෝ කිරීම, අතහැර දැමීම හෝ හිතාමතාම ඔවුන්ට ආහාර, ජලය හෝ නවාතැන් අහිමි කිරීම වරදක් වනු ඇති අතර, ඔවුන්ට සංචරණයට නිසි ඉඩක් ලබා නොදීම ද, හිංසනයක් සිදුවන ආකාරයට කොටු කර තැබීම ද දඬුවම් ලැබිය හැකි වරදක් වනු ඇත.
කුරිරු ආකාරයකින් සතෙකු මරා දැමීම මෙන්ම චේතනාන්විතව ගැබිනි සතෙකු මරා දැමීම හෝ විකිණීම සම්බන්ධයෙන් යම් පුද්ගලයෙක් මෙම නීතිය යටතේ වරදකරු වූ විට, ඔහුට රුපියල් 500,000 දක්වා දඩයක් පැනවීම හෝ අවුරුදු තුනේ සිට හතර දක්වා සිර දඬුවම් නියම කිරීම හෝ සිදු කරනු ඇත.
යෝජිත නව නීතිය යටතේ ඇති සියලුම වැරදි සංඥය වැරදි (වරෙන්තුවක් නොමැතිව අත්අඩංගුවට ගත හැකි වැරදි) වන අතර, ඒ අනුව පොලිසියට වරෙන්තුවක් නොමැතිව සැකකරුවන් අත්අඩංගුවට ගැනීමට ඉඩ ලැබෙන බව ද ප්‍රකාශ වෙයි.
