මෑතකදී මාලඹේ ප්‍රදේශයෙන් සොයාගත් විශාල ව්‍යාජ මත්පැන් බෝතල් තොගයක, සුරාබදු දෙපාර්තමේන්තුව විසින් අනුමත කරන ලද ආරක්ෂිත ස්ටිකරය අලවා තිබීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් විමර්ශනයක් ආරම්භ කර තිබේ.
පසුගිය දා මාලඹේ, සුදර්ශන මාවතේ පිහිටි නිවසක් වටලා දේශීය මත්පැන් සන්නාමයක් යටතේ පුරවා තිබූ මත්පැන් ලීටර් 3,345 ක් අඩංගු කාලේ බෝතල් 18,575 ක් අත්අඩංගුවට ගනු ලැබූ අතර මෙම ව්‍යාජ ව්‍යාජ මත්පැන් බෝතල්වල අලවා තිබූ ආරක්ෂිත ස්ටිකර් ව්‍යාජ ඒවා නොවන බවත්, ඒවා සුරාබදු දෙපාර්තමේන්තුව විසින් නිකුත් කරන ලද නියම ඒවා බවත් අනාවරණය වී ඇත.
බලපත්‍රලාභී නිෂ්පාදකයෙකු විසින් නිපදවන සෑම නීත්‍යානුකූල මත්පැන් බෝතලයකම ආරක්ෂිත ස්ටිකරයක් ඇලවීමේ ක්‍රමවේදය 2019 වසරේදී යහපාලන රජය විසින් හඳුන්වා දුන් අතර එම ස්ටිකර් මුද්‍රණය කිරීමේ ටෙන්ඩරය ‘මදුරාසි සිකියුරිටි ප්‍රින්ටර්ස්’ නම් සමාගමක් වෙත ලබාදී ඇත. මෙම ටෙන්ඩරය ලබාදීමද මහත් ආන්දෝලනයට තුඩු දුන් අතර මෙම වැටලීමට අදාළව කෝටිපති ව්‍යාපාරිකයෙකු සහ හිටපු හමුදා සාමාජිකයින් ඇතුළු පුද්ගලයින් හය දෙනෙකු අත්අඩංගුවට ගෙන ඇති අතර, ඔවුන්ට අදාළ ආරක්ෂිත ස්ටිකර් MSP මුද්‍රණ ආයතනයෙන් සෘජුවම ලැබුණේද, එසේත් නොමැතිනම් වෙනත් පාර්ශ්වයක් හරහා ලැබුණේද යන්න පිළිබඳව මේ වනවිට විමර්ශනය සිදුකරමින් ඇත.
