ස්ටීවන් යුස්ටාකියෝගේ විශිෂ්ට ගෝලය කැනඩාව 2026 ෆීෆා ලෝක කුසලාන තරගාවලියේ අවසන් 16 දෙනාගේ වටයට රැගෙන යයි.
2026 ෆීෆා ලෝක කුසලානයේ අද (29) උදෑසන පැවති දකුණු අප්රිකාව සහ කැනඩාව අතර 32 දෙනාගේ වටයේ තරඟයේදී දකුණු අප්රිකාවට එරෙහිව තියුණු ජයග්රහණයක් හිමිකර ගැනීමට කැනඩාව සමත් විය.
ස්ටීවන් යුස්ටාකියෝ අවසන් මොහොතේ ලබාගත් ගෝලයත් සමඟ දකුණු අප්රිකාව 0-1 ලෙස පරාජයට පත් කරමින් කැනඩාව ලෝක කුසලාන ඉතිහාසය වෙනස් කරමින් ප්රථම වතාවට අවසන් 16 දෙනා අතරට ගියේය.
ඒ අනුව ජෙසී මාර්ෂ්ගේ කැනඩා කණ්ඩායම මීළඟට හූස්ටන් ක්රීඩාංගණයේදී නෙදර්ලන්තය සහ මොරොක්කෝව අතර පැවැත්වෙන තරඟයේ ජයග්රාහකයන් සමඟ තරඟ වදිනු ඇත.
ලොස් ඇන්ජලීස් ක්රීඩාංගණයේදී අද පැවති තරඟයේ පළමු අර්ධයේදී දකුණු අප්රිකාවේ බෆානා බෆානා සිත් ඇදගන්නාසුළු දක්ෂතා පෙන්වමින් කැනඩා බාධකයන් තරණය කරන්නට උත්සාහ කළත් අවසානයේ ඔවුන් අසාර්ථක විය. පළමු අර්ධය අවසන් වීමට ආසන්නයේදී කැනඩා කණ්ඩායමහට ගෝල ලබාගැනීමට තිබූ අවස්ථා දෙකක්ම පිට පිටම අහිමි විය. මොයිස් බොම්බිටෝ හිසෙන් එල්ල කළ පහර සාර්ථකව ඕබ්රි මොඩිබා විසින් ගෝල සීමාව මතදී වළක්වාලනු ලැබූ අතර, ටජොන් බුකානන් එල්ල කළ පහරක් රොන්වෙන් විලියම්ස් විශිෂ්ට ලෙස වළක්වාලන ලදී.
තරඟය නැවත ආරම්භ කිරීමෙන් පසුව කැනඩාව තරඟයේ පාලනය නැවත සියතට ගත් අතර ටානි ඔලුවාසෙයි එල්ල කළ පහර විලියම්ස් විසින් විශිෂ්ට ලෙස වළක්වාලීමෙන් පසු, නැවත ආපසු පැමිණි පන්දුවට කැනඩා ක්රීඩකයා පහර දීමට පෙර එම්බෙකෙසෙලි එම්බොකාසි එය ඉවතට තල්ලු කළේ ය.
75 වැනි මිනිත්තුවේදී ඇල්ෆොන්සෝ ඩේවිස් විශාල ඝෝසාවක් සමඟ ක්රීඩා පිටියට පිවිසි අතර ඔහු සිය වේගය සහ උපක්රමශීලී බව මගින් දකුණු අප්රිකාවට දැඩි තර්ජනයක් එල්ල කළේය. දඬුවම් පහර කලාපය ආසන්නයේදී ඉපිලුන පන්දුවකට මනාව පාද හසුරවමින් එය දැලේ පහළ කෙළවරට යොමු කළ යුස්ටාකියෝ කැනඩාව 16 දෙනා අතරට ගෙන ගියේ ය.
ඉතිහාසයේ පළමු වරට පිළිමළුන් පිටුදැකීමේ 32 වටයට පැමිණි දකුණු අප්රිකාව, ඉතිහාසයේ ප්රථම වතාවට කැනඩාවට 16 දෙනා අතරට යන්නට මාර්ගය විවරකර දෙමින් තරඟාවලියෙන් ඉවත්විය.
