ෆෙරන් ටොරස් 106 වෙනි මිනිත්තුවේ ගහපු ගෝලයත් එක්ක, නිව්යෝර්ක් නිව් ජර්සි ක්රීඩාංගනයේ පසුගිය 20වෙනිදා උදේ පැවති, ෆීෆා ලෝක කුසලාන අවසන් මහා තරගයේදී, ලුයිස් ඩි ලා ෆුවෙන්ටේගේ ස්පාඤ්ඤ කණ්ඩායම ආර්ජන්ටිනාව 1-0 ක් ලෙස පරාජය කරමින්, පාපන්දු ඉතිහාසයේ දෙවන වරටත් ලෝක ශූරයන් බවට පත්වුණා.
‘ඒ ගෝලය ගැහුවේ මිලියන 47ක අපේ රටේ මිනිස්සු වෙනුවෙන්. මම එහෙමයි හිතන්නේ’ 2026 පාපන්දු ලෝක කුසලානය ජයග්රහනය කළ ස්පාඤ්ඤ කණ්ඩායමේ ඉදිරිපෙළ ක්රීඩක ෆෙරන් ටොරස් තරගයෙන් පස්සේ මාධ්යට එහෙම කියනවා.
‘අද දිනයේ ප්රතිඵලය කලින්ම ලියවී තිබූ එකක්. අපි අපේ රටේ ජනතාවගෙන් බොහෝ දුරස්ව සිටියත්, තරගය ජයග්රහණය කිරීමට අපට අවස්ථාව තිබුණා. මෙසී ප්රතිවාදී කණ්ඩායමේ සිටින විට චකිතයක් සැමවිටම ඇති වෙනවා. නමුත් අවසානයේ අපි හැමවෙලාවෙම අපේම පාපන්දු රටාවවෙන් ක්රීඩා කළා’. ෆෙරන් ටොරෙස් එහෙම කියනවා.
තරගයේ මුල සිට අග දක්වාම ආධිපත්යය දැරුවේ ස්පාඤ්ඤය. දක්ෂතාවය අහසට පොළව වගේ. ඒත් වාසනාව ආවේ සෑහෙන්න පමා වෙලා. එමිලියානෝ මාර්ටිනෙස්ව පහුකරලා පන්දුව හරියට ගෝලයට විදින්න ස්පාඤ්ඤයට 106 වැනි මිනිත්තුව වෙනකම් බලාගෙන ඉන්න උනා. ආජන්ටිනාව මේ තරගයේ ළඳරුවෝ වගේ තමයි සෙල්ලම් කළේ. ඒත් හැමවෙලාවෙම වාසනාව ඔවුන්ගේ අත්දෙක උඩ බලාගෙන හිටියා.
කොහොමවුණත් යුරෝපයේ පාපන්දු ශූරයන් සහ දකුණු ඇමරිකාවේ පාපන්දු ශූරයන් ගේ මේ හමුව පාපන්දු ලෝලීන්ට හොඳ තරගයක් බලන්න අවස්ථාව උදා කළා.
‘ඔවුන් සුවිශේෂී දක්ෂතා ඇති ක්රීඩකයින්. ඔවුන් සමඟ මෙම ගමනට එක්වීමට ලැබීම මට මහත් ගෞරවයක්. ආපසු හැරී බලන විට මට ඉතා හැඟීම්බර බවක් තමයි තියෙන්නේ. අපි ක්රීඩකයින් සමඟ බොහෝ දේ කතා කරලා තියෙනවා. අපි සියල්ල ජයගෙන තිබෙනවා. එය පුදුම සහගතයි.’ ස්පාඤ්ඤ සාර්ථකත්වය පිටිපස්සේ හිටිය යෝධයා ස්පාඤ්ඤ පුහුණුකරු ලුයිස් ඩි ලා ෆුවෙන්ටේ එහෙම කියනවා.
