2005 අගෝස්තු 12 වන දින රාත්රියේ, සිය පිහිනුම් තටාකයෙන් ගොඩඒමෙන් ටික වේලාවකට පසු කොළඹ පිහිටි ඔහුගේ දැඩි ආරක්ෂාව සහිත පෞද්ගලික නිවසේදී සැඟවී සිටි ස්නයිපර් වෙඩික්කරුවෙකු විසින් ලක්ෂ්මන් කදිර්ගාමර්ට වෙඩි තබන ලදී. ඔහුව කඩිනමින් ජාතික රෝහලට ඇතුළත් කර හදිසි සැත්කමකට භාජනය කළමුත් ඔහු ලද තුවාල හේතුවෙන් මිය ගියේය.
රජය එල්ටීටීඊයට දොස් පැවරීය. එවක එම සංවිධානයට ආරෝපණය කරන ලද ඉහළ පෙළේ ඝාතනවලදී බොහෝ විට සිදු වූවාක් මෙන්, මෙම ඝාතනයේදී ද කොටි සංවිධානය එහි වගකීම ප්රතික්ෂේප කළේය.
කෙසේ වෙතත්, සංවිධානයට ඔහුව ඝාතනය කිරීමට අවශ්ය වී ඇති බවට කදිර්ගාමර්ට එතරම් සැකයක් නොතිබුණි.
ඊට සති දෙකකට පමණ පෙර, එනම් ජූලි 29 වැනි දින ‘ද හින්දු’ පුවත්පත සමඟ පැවති සම්මුඛ සාකච්ඡාවකදී ඔහු තමාට එරෙහි එල්ටීටීඊ කුමන්ත්රණයක් පිළිබඳව අනතුරු අඟවන බුද්ධි අංශ වාර්තා ගැන කතා කර තිබුණි.
“ඕනෑම වෙලාවක ඔවුන්ට මා ඩැහැගත හැකියි,” එහිදී ඔහු පැවසීය. “තත්ත්වය උණුසුම් වෙමින් පවතින බවට මට ඉතා බරපතල වාර්තා ලැබෙනවා.” දින දහහතරකට පසු ඔහු මිය ගියේය.
ඝාතනය පිටුපස සිටියේ කවුද?
දශක දෙකකටත් වැඩි කාලයකට පසු ‘ජැෆ්නා මොනිටර්’, සංවිධානයේ බුද්ධි අංශ යන්ත්රණය පිළිබඳව හුරුපුරුදු හිටපු එල්ටීටීඊ සාමාජිකයින් සහ මුලාශ්ර සමඟ කතා කර ඇති අතර, ඝාතනය සිදුකළ බවට ඔවුන් පවසන කණ්ඩායම පිළිබඳ වාර්තාවක් ඔවුන් විසින් ලබා දී ඇත.
එම මූලාශ්රවලට අනුව මාරාන්තික වෙඩි ප්රහාරය එල්ල කළ පුද්ගලයා සෙම්පියන් (Sempiyan) නමින් හැඳින්වෙන පළපුරුදු ඉලක්කකරුවෙකු වූ එල්ටීටීඊ සාමාජිකයෙකි. වීරතේවන් (Veerathevan) නම් තවත් සාමාජිකයෙකු ඔහු සමඟ සිටියේය.
මෙම මෙහෙයුමේ භූමියේ අණදෙන්නිය ලෙස එල්ටීටීඊ බුද්ධි අංශයේ ජ්යෙෂ්ඨ කාන්තා සාමාජිකාවක වන මණිමේඛලෙයි (Manimekalai) එම මූලාශ්ර විසින් හඳුන්වන අතර ඇයගේ ක්රියාකාරකම් පිළිබඳව දැන සිටි හිටපු සාමාජිකයින් ඇයව විස්තර කළේ බුද්ධිමත් සහ ඉහළ හැකියාවක් ඇති සාමාජිකාවක් ලෙසිනි.
එම අවස්ථාවේදී, එල්ටීටීඊයේ බුද්ධි අංශ ප්රධානියා වන පොට්ටු අම්මාන් ලෙස වඩාත් ප්රකට ෂන්මුගලිංගම් සිවශංකර් යටතේ ක්රියාත්මක වූ කුඩා ඒකකයක ප්රධානියා ලෙස මණිමේඛලෙයි කටයුතු කළ බව එම මූලාශ්ර ප්රකාශ කළේය.
ඇයගේ වෘත්තීය ජීවිතයේ මුල් අවදියේදී, ඇය කොළඹ සහ දකුණේ වෙනත් ස්ථානවල ක්රියාත්මක වූ ජාලයන් සහිත ජ්යෙෂ්ඨ එල්ටීටීඊ බුද්ධි අංශ සාමාජිකයෙකු වූ චාල්ස් සමඟ සේවය කර ඇති බව ඔවුන් පැවසීය. චාල්ස් යනු ඝාතන සහ බෝම්බ ප්රහාර ඇතුළුව එල්ටීටීඊ පාලන ප්රදේශවලින් පිටත සංවිධානයේ වඩාත්ම සංවේදී රහසිගත මෙහෙයුම් බොහෝමයක් සමඟ සම්බන්ධ වූවෙක් ය.
කදිර්ගාමර් මෙහෙයුමට සෘජුවම සම්බන්ධ වූ බවට මූලාශ්ර විසින් හඳුනාගත් මෙම පුද්ගලයින් තිදෙනාට සැලකිය යුතු තරම් වෙනස් ඉරණම් හිමි විය.
‘ජැෆ්නා මොනිටර්’ වෙත අදහස් දැක්වූ හිටපු එල්ටීටීඊ සාමාජිකයින්ට අනුව 2009 දී මුලතිව් දිස්ත්රික්කයේ සෙම්මලේ හි පැවති සටන්වලදී වීරතේවන් මිය ගියේය.
යුද්ධයේ අවසාන අදියර දක්වා මණිමේඛලෙයි දිවි ගලවා ගත්තා ය. 2009 මැයි මාසයේදී රජයේ හමුදා මුල්ලිවයික්කාල් අවට අවසන් එල්ටීටීඊ පාලන ප්රදේශය වෙත ළඟා වෙත්ම, ඇය පුපුරණ ද්රව්ය කබායක් පුපුරුවාගෙන සියදිවි හානිකර ගත් බව එම මූලාශ්ර ප්රකාශ කළේය. සෙම්පියන්ට කුමක් සිදුවූයේද යන්න අපැහැදිලිය.
‘ජැෆ්නා මොනිටර්’ විසින් සම්මුඛ සාකච්ඡාවට ලක් කළ කිසිදු මූලාශ්රයකට ඔහුගේ ඉරණම නිශ්චිතව තහවුරු කිරීමට නොහැකි විය. හිටපු එල්ටීටීඊ සාමාජිකයින් විශ්වාස කරන්නේ ඔහු 2009 මැයි මාසයේ යුද්ධයේ අවසන් දින කිහිපය තුළ මිය යන්නට ඇති බවයි. එක් වාර්තාවකට අනුව, ඔහු අවසානය දක්වා එල්ටීටීඊ නායකත්වය සමඟ රැඳී සිට ඇත. නන්දිකඩාල් කලපුව ආසන්නයේ පැවති අවසන් සටන්වලදී ප්රභාකරන් සහ කුඩා සාමාජිකයින් කණ්ඩායමක් සමඟ මිය යන්නට ඇති බවත් එම මූලාශ්ර සැක කරයි.
සෝල්හයිම්
සටන් විරාමය සමයේ නෝර්වේහි ප්රධාන සාම පහසුකම් සපයන්නා වූ එරික් සෝල්හයිම්, රජයට සහ එල්ටීටීඊයට ජාත්යන්තර ආධාර බෙදා හැරීම සඳහා ඒකාබද්ධ යාන්ත්රණයක් නිර්මාණය කිරීමට ගත් උත්සාහය බිඳ වැටී තිබූ 2004 සුනාමියෙන් පසු ඇති වූ කැලඹිලි සහිත මාස තුළ කදිර්ගාමර්ගේ ඝාතනය සිදුවූ බව පෙන්වා දෙයි.
‘ජැෆ්නා මොනිටර්’ සමඟ පැවති සම්මුඛ සාකච්ඡාවකදී සෝල්හයිම් සිහිපත් කළේ, සුනාමිය විසින් සුළු කාලයකට අසාමාන්ය පොදු අරමුණක් පිළිබඳ හැඟීමක් ඇති කර තිබූ බවයි. රජයේ හමුදා සහ එල්ටීටීඊය වාර්ගික සීමාවන් නොතකා සිවිල් වැසියන්ට උපකාර කරමින් සිටි අතර, එම සහයෝගීතාව ඒකාබද්ධ ආධාර යාන්ත්රණයක් හරහා වඩාත් කල්පවත්නා දෙයක් බවට පත් කළ හැකි බවට නෝර්වේ අපේක්ෂා කළේය.
එය පැවතියේ නැත. එම වැඩපිළිවෙල දේශපාලන ආරවුල්වලට හසු වූ අතර අවසානයේ ශ්රේෂ්ඨාධිකරණය විසින් එය අවහිර කරන ලදී.
“එම බිඳවැටීමෙන් පසුව එල්ටීටීඊය, ලක්ෂ්මන් කදිර්ගාමර් ඝාතනය කරමින් ප්රතිචාර දැක්වීය,” සෝල්හයිම් පැවසීය. “එම යාන්ත්රණය බිඳ වැටුණේ නැතිනම් එය සිදු නොවන්නට ඉඩතිබුණි.” සටන් විරාමය ජීවමානව තබා ගැනීමට උත්සාහ කළ අයට මෙම ඝාතනය නිසැක පණිවිඩයක් යැවූ බව සෝල්හයිම් පැවසීය.
“ඔහු රජයේ පාර්ශ්වයේ ප්රධාන චරිතයක් වී සිටි නිසා, ඔහුගේ ඝාතනයෙන් එල්ටීටීඊය සාම ක්රියාවලිය සැබවින්ම විශ්වාස නොකරන බවට ප්රබල සංඥාවක් ලබා දුන්නේය.” මෙම ඝාතනයට අණ දුන් බව ප්රභාකරන් කිසිදා පිළිගත්තේ නැති බව සෝල්හයිම් පැවසීය. නමුත් ඊට වගකිව යුත්තේ කවුරුන්ද යන්න ගැන සෝල්හයිම්ට කිසිදු සැකයක් තිබී නැත.
“එල්ටීටීඊය හැර වෙනත් කිසිවෙකුට මෙතරම් සූක්ෂ්ම ප්රහාරයක් සැලසුම් කළ නොහැකිය,” ඔහු පැවසීය. ඔහුගේ තක්සේරුවට අනුව, සංවිධානයේ ඉහළම මට්ටමේ අනුමැතියකින් තොරව එම පරිමාණයේ මෙහෙයුමක් දියත් කිරීමට ද නොහැකිය.
“මේවා නිදහස් ක්රියාමාර්ග නොවීය,” සෝල්හයිම් පැවසීය. “මගේ අවබෝධයට අනුව, මෙවැනි සියලුම ප්රධාන හමුදා මෙහෙයුම් ප්රභාකරන් විසින්ම හෝ පොට්ටු අම්මාන් විසින් අනුමත කළ යුතුව තිබුණි.”
සෝල්හයිම්ට අනුව, මෙහි ප්රතිවිපාක ශ්රී ලංකාවේ ප්රබලම අමාත්යවරයෙකුගේ මරණයෙන් ඔබ්බට විහිදී ගියේය. අඛණ්ඩ ඝාතන හරහා එල්ටීටීඊය ජාත්යන්තරව තවදුරටත් හුදකලා වනු ඇති බවත්, අවසානයේ එය යුරෝපය තුළ තහනම් කිරීමට හේතු වනු ඇති බවත් ඔහු ප්රභාකරන්ට නිරන්තරයෙන් අනතුරු අඟවා තිබුණි.
“2005 අගෝස්තු 12 මට මතකයේ රැඳී ඇත්තේ දරුණු දිනයක් ලෙසයි. ඔහුගේ ඝාතනය සුවිශේෂී විදේශ අමාත්යවරයෙකු සහ රාජ්ය තාන්ත්රිකයෙකු අහිමි වීමක් පමණක් නොවේ. ඔහුගේ ආදර්ශයෙන් ආභාෂය ලබා විදේශ සේවයට ඇතුළත් වූ අප ඇතැමෙකුට, එය අපේක්ෂා කළ ප්රමිතියක් අහිමි වීමක් ද විය.” මහීෂිණී කොලොන්නේ ලිවීය.
ලක්ෂ්මන් කදිර්ගාමර් කොළඹදී ඝාතනය වී වසර විසිඑකකට පසු, ඉන්දියාවේ ශ්රී ලංකා මහ කොමසාරිස්වරිය හිටපු විදේශ අමාත්යවරයාව සිහිපත් කර ඇත්තේ, රාජ්යතාන්ත්රික සේවයට එක්වීමට තමාට ආභාෂය ලබා දුන් සහ තම වෘත්තීය ජීවිතය හැඩගැස්වීමට අඛණ්ඩව දායක වූ ප්රමිතියක් සැකසූ පුද්ගලයා ලෙසිනි.
ශ්රී ලංකාවේ රාජ්යතාන්ත්රික කවයන් තුළ වඩාත්ම දක්ෂ වෘත්තීය රාජ්යතාන්ත්රිකයන්ගෙන් කෙනෙකු ලෙස පුළුල්ව පිළිගැනෙන මහීෂිණී කොලොන්නේ බදාදා ප්රකාශ කළේ, තමා ශ්රී ලංකා විදේශ සේවයට එක්වන විට කදිර්ගාමර් විදේශ අමාත්යවරයා වූ බවත්, ඔහු යටතේ සේවය කළ රාජ්යතාන්ත්රික පරම්පරාවක්, කදිර්ගාමර් විසින් සකස් කළ ඉහළ ප්රමිතීන් සිහිපත් කළ බවත්ය.
“මීට වසර විසිඑකකට පෙර අද වැනි දිනෙක ශ්රී ලංකාවට ගරු ලක්ෂ්මන් කදිර්ගාමර් අහිමි විය,” යැයි සංවත්සරය සනිටුහන් කරමින් කොලොන්නේ සිය ෆේස්බුක් සටහනක ලිවීය. “මට නම්, මෙය අතිශය පෞද්ගලික සිහිපත් කිරීමකි.”
කොලොන්නේ 1998 ජූලි මාසයේදී විදේශ සේවයට එක්වූයේ, කදිර්ගාමර් විදේශ අමාත්යවරයා ලෙස කටයුතු කළ පළමු ධුර කාලය තුළ දීය. ඇය 2025 ජූනි මාසයේදී ඉන්දියාවේ මහ කොමසාරිස්වරිය ලෙස වත්මන් තනතුර භාරගත් අතර ඊළඟ මාසයේදී ජනාධිපති ද්රෞපදී මුර්මු වෙත සිය අක්තපත්ර පිළිගැන්වූවාය.
ඇයගේ පෙර රාජකාරිවලට නිව්යෝර්ක් හි එක්සත් ජාතීන්ගේ සංවිධානයේ ශ්රී ලංකා නිත්ය නියෝජිත කාර්යාලයේ පත්වීම් දෙකක් සහ 2011 සිට 2014 දක්වා ඉන්දියාවේ නියෝජ්ය මහ කොමසාරිස්වරිය ලෙස කටයුතු කළ කාලය ද ඇතුළත් විය. නවදිල්ලියට යාමට පෙර, ඇය විදේශ අමාත්යාංශයේ බහුපාර්ශ්වික කටයුතු පිළිබඳ අතිරේක ලේකම්වරිය ලෙස ද සේවය කළාය.
“මා විදේශ සේවයට එක්වන විට විදේශ අමාත්යවරයා වූයේ එතුමායි,” කොලොන්නේ ලිවීය. “ඔහුගේ බුද්ධිය, වෘත්තීයභාවය සහ ශ්රී ලංකාව නියෝජනය කිරීමේදී ඔහු දැක්වූ ගෞරවනීයත්වය මා විදේශ සේවයට ඇතුළත් වීමට පෙළඹවූ හේතූන් අතර විය.”
කදිර්ගාමර්ගේ අපේක්ෂාවන් රාජ්යතාන්ත්රිකත්වයේ විධිමත් රාජකාරිවලින් ඔබ්බට විහිදුණු බව ඇය සිහිපත් කළාය.
“ඔහු අපව ඉහළ ප්රමිතියක රඳවා ගත්තේය,” ඇය ලිවීය. “රාජ්යතාන්ත්රිකයෙකුගේ කාර්යය කිසිදා අවසන් නොවන බවත් — අප කොතැනක සිටියත්, කුමක් කළත්, අප සැමවිටම අපගේ රට නියෝජනය කරන බවත් ඔහු විශ්වාස කළේය.”
ඇයට මතක තිබූ තවත් පාඩමක් තිබුණි : එනම් නිරවද්යතාවයයි.
“ඔහු අපට ඉගැන්වූ කරුණු අතර සෑම වචනයකටම අර්ථයක් ඇති බවත්, රාජ්යතාන්ත්රික කටයුතුවලදී වචන වැදගත් වන බවත් ප්රධාන වේ.”
තනි ආණ්ඩුවලට සහ පුද්ගලයින්ට වඩා කල්පවත්නා වෘත්තීය විදේශ සේවයක් ගොඩනැගීමේ අවශ්යතාවය සහ ආයතන කෙරෙහි කදිර්ගාමර් කළ අවධාරණයද කොලොන්නේ සිහිපත් කළාය.
1932 දී කොළඹදී උපත ලැබූ ලක්ෂ්මන් කදිර්ගාමර් සිවිල් යුද සමයේදී ශ්රී ලංකාවේ වඩාත් කැපී පෙනෙන ජාත්යන්තර චරිතයක් බවට පත් වූ දෙමළ ක්රිස්තියානි ජාතිකයෙකි. ලංකා විශ්වවිද්යාලයෙන් (University of Ceylon) නීතිය හැදෑරූ ඔහු පසුව ඔක්ස්ෆර්ඩ් හි බේලියෝල් විද්යාලයට (Balliol College, Oxford) ඇතුළත් වූ අතර 1959 දී ඔක්ස්ෆර්ඩ් සංගමයේ (Oxford Union) සභාපති බවට පත් විය.
ශ්රී ලංකාව සහ බ්රිතාන්යය තුළ නීතිඥයෙකු ලෙස කටයුතු කළ ඔහු, ජාත්යන්තර කම්කරු සංවිධානය (International Labour Organization) සහ ලෝක බුද්ධිමය දේපල සංවිධානය (World Intellectual Property Organization) ඇතුළු ජිනීවා හි පිහිටි ජාත්යන්තර සංවිධාන වෙනුවෙන්ද සේවය කළේය.
සාපේක්ෂව ප්රමාද වී ජාතික දේශපාලනයට පිවිසෙන කදිර්ගාමර් වයස අවුරුදු 62 දී එනම් 1994 දී ජනාධිපතිනි චන්ද්රිකා බණ්ඩාරනායක කුමාරතුංගගේ රජයේ විදේශ අමාත්යවරයා බවට පත් විය. 2001 දක්වා සේවය කළ ඔහු 2004 දී යළිත් අමාත්යාංශයට පැමිණි අතර ඝාතනය වනතෙක් විදේශ අමාත්යවරයා ලෙස කටයුතු කළේය.
ඔහුගේ ධුර කාලයන් පැවතියේ, ශ්රී ලංකා රජය සහ උතුරේ සහ නැගෙනහිර ස්වාධීන දෙමළ රාජ්යයක් වෙනුවෙන් සටන් කළ දෙමළ ඊළාම් විමුක්ති කොටි සංවිධානය අතර වඩාත් දරුණු සහ ලේ වැකි ගැටුම් පැවති කාලපරිච්ඡේදයන් කිහිපයක් තුළය.
කදිර්ගාමර් එල්ටීටීඊයේ වඩාත් දැඩි ජාත්යන්තර විරුද්ධවාදියෙකු බවට පත් විය. විදේශයන්හි රජයේ ස්ථාවරය තහවුරු කිරීම සඳහා ඔහු පුළුල් ලෙස කටයුතු කළ අතර කොටි සංවිධානයේ විදේශීය දේශපාලන සහ මූල්ය ජාල සීමා කිරීමට ද කටයුතු කළේය. ඔහුගේ රාජ්යතාන්ත්රික මෙහෙයුම එක්සත් ජනපදය සහ බ්රිතාන්යය ඇතුළු රටවල් කිහිපයක එල්ටීටීඊය තහනම් කිරීමට දායක විය.
එසේ වුවද, එල්ටීටීඊයට විරුද්ධ වීම යනු දෙමළ අනන්යතාවය ප්රතික්ෂේප කිරීමක් යන අදහසට ඔහු විරුද්ධ විය. පුරවැසිභාවය වාර්ගිකත්වය හෝ ආගම මත තීරණය නොවන ශ්රී ලංකාවක් වෙනුවෙන් ඔහු නිරන්තරයෙන් තර්ක කළ අතර, වසර ගණනාවක යුද්ධයෙන් පසු දෙමළ, සිංහල සහ මුස්ලිම් ජනතාව අතර විශ්වාසය යළි ගොඩනැගීමේ අවශ්යතාව ගැන කතා කළේය.
ඔහුගේ ධුර කාලය තුළ ගැටුමට සම්බන්ධ නොවන රාජ්යතාන්ත්රික උරුමයක් ද බිහි විය. වෙසක් උත්සවයට ජාත්යන්තර පිළිගැනීමක් ලබා ගැනීම සඳහා එක්සත් ජාතීන්ගේ සංවිධානයේ ශ්රී ලංකා මෙහෙයුමට කදිර්ගාමර් නායකත්වය දුන් අතර, එහි ප්රතිඵලයක් ලෙස එක්සත් ජාතීන්ගේ සංවිධානය තුළ එය ජාත්යන්තරව සැමරීමට ඉඩ සලසමින් 1999 දී මහා මණ්ඩල යෝජනාවක් සම්මත විය.
කදිර්ගාමර් උරුමයේ අඳුරු පැත්ත
ආරක්ෂක අංශ අතුරුදන් කිරීම්, අධිකරණ බලයෙන් තොරව සිදුකළ ඝාතන සහ වෙනත් අපයෝජනයන් පිළිබඳ චෝදනාවලට මුහුණ දෙද්දී, ඔහුගේ රාජ්යතාන්ත්රික හැකියාවන් පැවති එම රජයන් ආරක්ෂා කිරීමට දායක වූ බව තර්ක කරන මානව හිමිකම් ක්රියාකාරීන් අතර කදිර්ගාමර්ගේ උරුමය පිළිබඳව අඳුරු ප්රති-ආඛ්යානයක් ද පවතී.
චෙම්මනි (Chemmani) යනු සමහර විට එහි අඳුරුතම සිද්ධිය ලෙස කැපී පෙනේ. 1996 වසරේදී යාපනයේ පාසල් දැරියක වූ ක්රිෂාන්ති කුමාරස්වාමි දූෂණය කොට ඝාතනය කිරීමෙන් පසුව, වරදකරු වූ සොල්දාදුවෙකු කියා සිටියේ හමුදාව යාපනය යළි අත්පත් කර ගැනීමෙන් පසු අතුරුදන් වූ සිය ගණනක් ජනතාව එහි සමූහ මිනීවළවල්වල වළදමා ඇති බවයි. ඇම්නෙස්ටි ඉන්ටර්නැෂනල් (Amnesty International) ආයතනය එම කාලසීමාව තුළ යාපනයේ සිදු වූ අතුරුදන්වීම් 600ක් පමණ ලේඛනගත කළ අතර ස්වාධීන පරීක්ෂණයක් ඉල්ලා සිටියේය. පසුව සිදු කළ කැණීම්වලදී මිනිස් අවශේෂ හමුවීමෙන් එම චෝදනාවලට බිහිසුණු බරක් එක් විය.
වගවීම ඇනහිට තිබියදීත්, චෝදනා විමර්ශනය කරන බවට වූ කොළඹ සහතිකය ගෙනහැර දක්වමින්, ජාත්යන්තර බලපෑම් පාලනය කිරීමට කදිර්ගාමර් කටයුතු කළ බවට විචාරකයෝ චෝදනා කරති. ඔවුන්ගේ දැක්මට අනුව, තම ආරක්ෂක අංශ බරපතල මානව හිමිකම් උල්ලංඝනය කිරීම් සම්බන්ධයෙන් චෝදනා ලබා සිටි විටකදී රාජ්යය වෙනුවෙන් ලෝක වේදිකාව මත ඔහු අසාමාන්ය ලෙස ඵලදායී ආරක්ෂකයෙකු ලෙස කටයුතු කළේය.
අරුලිනියන් මහලිංගම් විසින් ‘Sri Lanka’s Envoy to India Remembers Lakshman Kadirgamar, 21 Years After His Assassination’ යන හිසින් ජැෆ්නා මොනිටර් වෙබ් අඩවිය වෙත ඉංග්රීසි භාෂාවෙන් ලියූ ලිපිය සිංහලට පරිවර්තනය කර කෙටි සංස්කරණයකට ලක්කර ඇත.
