මීගමුව බන්ධනාගාරයේ සිදු වූ නොසන්සුන්කාරී සිදුවීම හේතුවෙන් මියගිය රැඳවියන් 21දෙනා සඳහා සුදුසු වන්දි මුදලක් ලබාදීමට පියවර ගන්නා ලෙස සිරකරු අයිතිවාසිකම් සුරැකීමේ කමිටුව, අධිකරණ අමාත්‍ය හර්ෂණ නානායක්කාර මහතාගෙන් ඉල්ලා සිටියි.
එම කමිටුවේ සභාපති, නීතිඥ සේනක පෙරේරාගේ අත්සනින් යුතුව ජූලි 21 වැනි දින යොමු කර ඇති මෙම ලිපිය මගින් පෙන්වා දෙන්නේ මියගිය රැඳවියන්ගේ භාරකාරත්වය සහ වගකීම ශ්‍රී ලංකා රජය සතු බවයි. බන්ධනාගාරයක් තුළ රැඳවියකු ඝාතනය වන්නේ නම් එහි වගකීම රජය විසින් භාරගත යුතු බවට වත්මන් ජනාධිපතිවරයා දරන ස්ථාවරය ද කමිටුව විසින් සිහිපත් කර දී තිබේ.
එසේම, අතීතයේ සිදු වූ මෙවැනි සිදුවීම්වල දී පත්කළ පරීක්ෂණ කොමිෂන් සභා වාර්තාවල නිර්දේශ ක්‍රියාත්මක නොකිරීම හේතුවෙන් රැඳවියන් අතර නොසන්සුන්තාව වර්ධනය වීමට පසුබිම සකස් වූ බවත්, ඒ පිළිබඳව සියලු බලධාරීන් සාමූහිකව සහ වෙන් වෙන්ව වගකිව යුතු බවත් එම ලිපියේ සඳහන් වේ.
ශ්‍රී ලංකාව අත්සන් කර ඇති “සිරකරුවන්ට සැලකීම පිළිබඳ අවම සම්මුතිය” (Nelson Mandela Rules) ප්‍රකාරව මෙන්ම, “සිරකරුවන්ද මනුෂ්‍යයෝය” යන රාජ්‍ය ප්‍රතිපත්තිය මත පිහිටා කටයුතු කරමින් මියගිය රැඳවියන් වෙනුවෙන් සාධාරණ වන්දි මුදලක් ලබාදීම රජයේ වගකීමක් බව කමිටුව වැඩිදුරටත් අවධාරණය කරයි.
මෙම ලිපියේ පිටපතක් ජනාධිපති ලේකම් කාර්යාලය වෙත ද යොමු කර තිබේ.
