ශ්රී ලංකාවේ සමස්ත අධිකරණ පද්ධතියෙහි පවතින ව්යූහාත්මක මෙන්ම පරිපාලනමය ගැටලු සම්බන්ධයෙන් පාර්ලිමේන්තුවේ කඩිනම් මැදිහත්වීම අවශ්ය බව පවසමින් විපක්ෂයේ මන්ත්රීවරුන් පිරිසක් විසින් කථානායකවරයා වෙත අද දින (23) විශේෂ ලිපියක් භාර දී තිබේ.
පාර්ලිමේන්තු ස්ථාවර නියෝග 19 (1) යටතේ මෙය හදිසි පොදු වැදගත්කමකින් යුක්ත කාරණයක් ලෙස සලකා, මේ පිළිබඳව කල්තැබීමේ විවාදයක් ලබාදෙන ලෙස ඔවුහු කථානායකවරයාගෙන් ඉල්ලා සිටිති.
විපක්ෂය පෙන්වා දෙන්නේ වර්තමානයේ යුක්තිය පසිඳලන ආයතනවල පවතින පුරප්පාඩු හේතුවෙන් එම ආයතනවල දෛනික කාර්යයන් කාර්යක්ෂමව සහ විධිමත්ව කරගෙන යාමට නොහැකි වී ඇති බවයි. මෙහි සෘජු ප්රතිඵලයක් ලෙස අධිකරණ පද්ධතිය තුළ නඩු විශාල වශයෙන් ගොඩගැසෙන අතර නඩු විභාග ප්රමාද වීමද සීඝ්රයෙන් ඉහළ ගොස් තිබේ.
ජනතාවට සාධාරණය සහ යුක්තිය නියමිත කාලය තුළ ඉටු නොවීම වර්තමානයේදී රට තුළ බරපතළ අර්බුදයක් බවට පත්ව ඇති අතර, මේ නිසා අධිකරණ පද්ධතිය කෙරෙහි මහජනතාව තබා ඇති විශ්වාසය බිඳවැටෙමින් පවතින බවට විපක්ෂය අනතුරු අඟවයි.
මේ සඳහා දයාසිරි ජයසේකර, අජිත් පෙරේරා, ජේ.සී. අලවතුවල, මුජිබර් රහ්මාන්, රෝහිණී විජයරත්න, හෙක්ටර් අප්පුහාමි සහ සුජීව සේනසිංහ ඇතුළු විපක්ෂයේ පාර්ලිමේන්තු මන්ත්රීවරුන් පිරිසක් සිය අත්සන් තබා ඇත.
