විදේශ රැකියාවල නිරත ශ්‍රී ලාංකිකයන් වෙනුවෙන් කුවේට් අරමුදලෙන් රුපියල් බිලියන 2.1ක මූල්‍ය ප්‍රතිපාදන සහිත නව විශ්‍රාම වැටුප් ක්‍රමයක් හඳුන්වා දෙන බව විදේශ කටයුතු සහ විදේශ රැකියා නියෝජ්‍ය අමාත්‍ය අරුණ හේමචන්ද්‍ර මහතා පාර්ලිමේන්තුවේදී පැවසීය.
මිලියන 1.7ක් වන විදේශ රැකියා නියුක්තිකයන්ගෙන් දැනට පවතින ක්‍රමය යටතේ විශ්‍රාම වැටුප් ලබන්නේ 307 දෙනෙකු පමණක් බැවින් මෙම ප්‍රතිසංස්කරණ කඩිනම්ව සිදු කළ යුතු බව ඔහු සඳහන් කළේය.
යෝජිත නව ක්‍රමය යටතේ සේවකයන්ට තම සේවා කාලය හා ආදායම මත මාසික විශ්‍රාම වැටුපක් හෝ එකවර ලැබෙන මුදලක් ලෙස ප්‍රතිලාභ තෝරාගත හැක. මෙම වැඩපිළිවෙළ 2026 දෙසැම්බර් 31 වනදාට පෙර ක්‍රියාත්මක කිරීම රජයේ අපේක්ෂාව යි.
එසේම, ශ්‍රී ලාංකික සංක්‍රමණික සේවකයන් නීත්‍යානුකූලව ශ්‍රී ලංකාවට එවන විදේශ ප්‍රේෂණ, ඩිජිටල් ලෙස වාර්තා කිරීමට විශේෂ ජංගම දුරකථන යෙදවුමක් හඳුන්වා දෙන අතර විශ්‍රාම වැටුප් ප්‍රතිලාභ ගණනය කරනු ලබන්නේ මුදල් එවන්නන් විසින් තහවුරු කරන එම වාර්තා පදනම් කරගෙන ය.
විදේශ රැකියා කාර්යාංශය, මහ බැංකුව සහ ඩිජිටල් තාක්ෂණ අමාත්‍යාංශය එක්ව ස්වේච්ඡා පදනමින් මෙය ක්‍රියාත්මක කිරීමට නියමිතය.
