බෝම්බ ප්රහාරයකින් ඝාතනයට ලක්වූ ඉරානයේ හිටපු උත්තරීතර නායක අයතුල්ලා අලි ඛමේනිගේ දේහය, ගෞරව දැක්වීම සඳහා සිකුරාදා දින ටෙහෙරාන් නුවර දැවැන්ත යාඥා ශාලාවක තැන්පත් කර තිබුණි.
ඔහුගේ 37 වසරක පාලනය පසුගිය පෙබරවාරි මාසයේදී එල්ල වූ යුද්ධයේ පළමු ගුවන් ප්රහාරයෙන්ම අවසන් වූ අතර, ඉහළ පෙළේ ආගමික නායකයින්, රාජ්ය නිලධාරීන්, විදේශීය නියෝජිතයින් සහ ලක්ෂ සංඛ්යාත සාමාන්ය ජනතාවක් අවසන් ගෞරවය දැක්වීමට එක්ව සිටිති.
සතියක් පුරා පැවැත්වෙන මෙම දැවැන්ත අවමංගල්ය පෙරහැර ඉරානයේ සහ ඉරාකයේ ප්රධාන ෂියා ආගමික මධ්යස්ථාන වන කොම්, නජාෆ් සහ කර්බාලා යන නගර හරහා ගමන් කිරීමට නියමිතය. ඉන්පසුව, බ්රහස්පතින්දා දින ඉරානයේ අති පූජනීය නගරයක් වන මෂ්හාඩ් හිදී දේහය භූමදානය කරනු ඇත.
ඔහුගේ දේහය රැගත් මිනී පෙට්ටිය ජනතාවට විවෘත කළ අවස්ථාවේදී, හැඬුම් පිරි ජනයා තම හිසෙහි අත් ගසා ගනිමින් සහ ශෝක ගී ගායනා කරමින් සිය දැඩි සංවේගය ප්රකාශ කළහ. ඛමේනිගේ පූර්වගාමියා වූ අයතුල්ලා රුහොල්ලා ඛොමේනිට ගෞරව කිරීම සඳහා ඉදිකරන ලද දැවැන්ත යාඥා ශාලාවේ මෙම දේහය තැන්පත් කර තිබූ අතර, ඉස්ලාමීය නබිනායක මුහම්මද් තුමාගෙන් පැවත එන බව සංකේතවත් කරන කළු පැහැති තලප්පාවක් දේහය මත තබා තිබුණි.
මෙම අවමංගල්යය ඉරාන ඉතිහාසයේ ඉතා තීරණාත්මක මොහොතක සිදුවන්නකි. ඉස්ලාමීය ජනරජය බාහිර සතුරන්ගෙන් එල්ල වූ දැවැන්ත යුද තර්ජනවලින් බේරී සිටියද, අභ්යන්තරික වශයෙන් ඔවුන් දැඩි අර්බුද රැසකට මුහුණ දී සිටී. වසර ගණනාවක ආර්ථික සම්බාධක සහ මෑතකදී ඇතිවූ මහජන විරෝධතා දැඩි ලෙස මර්දනය කිරීම හේතුවෙන් පාලනය කෙරෙහි පවතින ජනතා සහයෝගය අඩුවෙමින් පවතී. නව උත්තරීතර නායකයා ලෙස පත්ව ඇති මොජ්තබා ඛමේනි ද පියා මියගිය ප්රහාරයෙන් තුවාල ලබා ඇති අතර, ඔහු මෙතෙක් ප්රසිද්ධියේ පෙනී සිට නැත.
අභ්යන්තරික ගැටලු මධ්යයේ වුවද, බලධාරීන් මෙම අවස්ථාව රාජ්ය බලය සහ ජනතා සහභාගිත්වය ප්රදර්ශනය කිරීම සඳහා යොදා ගනිමින් සිටී. ටෙහෙරානයේ වීදිවල ආරක්ෂාව දැඩි කර ඇති අතර, බසිජ් අර්ධ-හමුදා බලකායේ සාමාජිකයින් යතුරුපැදිවලින් මුර සංචාරයේ යෙදෙති. අවමංගල්යය අතරතුර කිසිදු ප්රහාරයක් එල්ල නොකරන ලෙස ඉරානය, ඇමරිකාවට සහ ඊශ්රායලයට අනතුරු අඟවා ඇත.
හිටපු රුසියානු ජනාධිපති දිමිත්රි මෙද්වදෙව්, පකිස්ථාන අගමැති ෂෙබාස් ෂරීෆ් මෙන්ම හිස්බුල්ලා සංවිධානයේ මියගිය නායකයින්ගේ පවුල්වල සාමාජිකයින් ද මීට සහභාගී වී ඇත. ඛමේනි සමඟ එම ප්රහාරයෙන් මියගිය ඔහුගේ දියණිය, බෑණා, මිනිබිරිය සහ ලේලියගේ දේහයන් ද ප්රධාන දේහය අසල තැන්පත් කර තිබුණි.
ඉස්ලාමීය සම්ප්රදායට අනුව මරණයෙන් දිනක් ඇතුළත දේහය භූමදානය කළ යුතු වුවද, යුධමය වාතාවරණය හේතුවෙන් එය කල් දැමීමට සිදුවිය. මෑතකදී ඇති කරගත් තාවකාලික සටන් විරාම ගිවිසුමෙන් පසුව මෙම අවමංගල්යය සංවිධානය කර ඇත. දුරබැහැර සිට පැමිණෙන ශෝකවන්නන් වෙනුවෙන් හෝටල්වල 50%ක වට්ටම් ලබා දී ඇති අතර, පාසල් සහ පල්ලි ආදිය ජනතාවට නවාතැන් ගැනීම සඳහා පහසුකම් සපයා ඇත.
තොරතුරු සහ ඡායාරූප – රොයිටර් පුවත් සේවය
