පිළිකා රෝගීන් සඳහා ලබා දෙන Oxaliplatin වැනි කීමෝ ඖෂධවල සිට කොලොස්ටොමි බෑග්ස් දක්වා ඖෂධ සහ ශල්ය උපකරණවල විශාල පරිමාන හිඟයක් ඇතැයි සෞඛ්ය අමාත්යාංශ ආරංචි මාර්ගවලින් ප්රකාශ වෙයි.
මේ පිළිබඳව කරුණු විමසීමේදී වෛද්යවරුන්ගේ වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව ප්රකාශ කළේ ගෙවී ගිය මාස හයක කාලසීමාව තුළ පමණක් මෙරට රෝහල් පද්ධතියේ භාවිත කළ ප්රධාන පෙළේ ඖෂධ හා ශල්ය උපකරණ කාණ්ඩ 40කට ආසන්න ප්රමාණයක් බාල ප්රමිතිය නිසා වරින් වර භාවිතයෙන් ඉවත් කර ඇති බවය.
පසුගිය වසරේ දෙසැම්බර් මාසයේ සිදුවූ සැකකටයුතු රෝගී මරණ හේතුවෙන් ‘ඔන්ඩෙස්ටරොන්’ (Ondansetron) ඇතුළු ඖෂධ කාණ්ඩ 10ක් එකවර භාවිතයෙන් ඉවත් කළද, ජාතික ඖෂධ නියාමන අධිකාරිය (NMRA) මේ දක්වා ඒ පිළිබඳ කිසිදු නිශ්චිත පැහැදිලි කිරීමක් කර නොමැති බව ප්රකාශ කරන ඒ මහතා වැඩිදුරටත් ප්රකාශ කරන්නේ ජීවිතාරක්ෂක සහ ප්රධාන ඖෂධ වල බරපතල අඩුවක් තිබෙන බවය. දියවැඩියාව සඳහා ලබාදෙන Metformin, Doxycycline, Prednisolone, හෘද රෝග සඳහා ලබාදෙන GTN පෙති, Lidocaine නික්ෂේපණය, Caphalexin දියරය, Salbutamol ආශ්වාස දියරය, Mexalon නික්ෂේපණය සහ IV Cefuroxime හිඟ බව කියා සිටියේ ය.
Colostomy bags (මළපහ එකතු කරන බෑග්), Angiogram catheters (හෘද පරීක්ෂණ නල), Povidone catheters, සිරිංජ (Syringes) සහ ජීවී සේලයින් වර්ග (ORS), හෘද ස්ටෙන්ට් කාණ්ඩ 3ක්ද වෛද්ය සැපයුම් ඒකක දත්ත පද්ධතියට අනුව භාවිතයෙන් ඉවත් කර ඇති බව ප්රකාශ කරන ඒ මහතා ඒ අනුව එම කාණ්ඩල දෑ රෝහල් පද්ධතිය තුළ නැතැයි ප්රකාශ කරයි.
