දෙහිවල ජාතික සත්වෝද්යානයේ 90 වැනි සංවත්සරයට සමගාමීව, මෑතකදී උපත ලැබූ සිංහ පැටවුන් දෙදෙනාගේ නම් නිල වශයෙන් ප්රකාශයට පත් කිරීම සහ නයිල් හිපපොටේමස් පැටවා සඳහා පාසල් දරුවන්ගෙන් නම් යෝජනා කැඳවීම ඇතුළු විශේෂ වැඩසටහන් රැසක් සංවිධානය කර ඇති බව ජාතික සත්වෝද්යාන දෙපාර්තමේන්තුව නිවේදනය කරයි.
මෙම සංවත්සර උළෙල 2026 ජූලි 03 වැනිදා පැවැත්වෙන අතර, මහජනතාවගේ දැඩි ආදරයට පාත්ර වූ දෙහිවල සත්වෝද්යානයේ සිංහ පැටවුන් දෙදෙනා සඳහා තෝරාගත් නම් එදින නිල වශයෙන් ප්රකාශයට පත් කිරීමට නියමිතය. එම නම් සතුන්ට ආදරය කරන්නන් විසින් ඉදිරිපත් කරන ලද යෝජනා අතරින් තෝරාගෙන ඇති අතර, ජයග්රාහකයන්ට ත්යාග පිරිනැමීමට ද කටයුතු යොදා තිබේ.
සංවත්සර සැමරුමට සමගාමීව, සිංහ දූපතේදී සිංහ පැටවුන් දෙදෙනා ඔවුන්ගේ මව සමඟ මහජනතාවට නැරඹීම සඳහා විශේෂ අවස්ථාවක් ද සලසා ඇත.
එමෙන්ම, මෑතකදී උපත ලැබූ නයිල් හිපපොටේමස් පැටවා ද පළමු වරට මහජනතාවට හඳුන්වා දීමට නියමිත අතර, එම පැටවා සඳහා නම් තැබීමේ විශේෂ තරඟයක් වයස අවුරුදු 18ට අඩු පාසල් දරුවන් වෙනුවෙන් ආරම්භ කර තිබේ.
එම දෙපාර්තමේන්තුව පෙන්වා දෙන්නේ, මෙම වැඩසටහනේ අරමුණ ලාබාල සත්ව ලෝලීන් වනජීවී සංරක්ෂණය, සත්ව සුබසාධනය සහ පාරිසරික වගකීම පිළිබඳ වැඩි අවධානයක් යොමු කිරීමට දිරිගැන්වීම බවයි.
1936 ජූලි 03 වැනිදා ආරම්භ කරන ලද දෙහිවල ජාතික සත්වෝද්යානය මේ වන විට සිය 90 වසරක ගමන් මඟ සම්පූර්ණ කර තිබේ.
අක්කර 23ක හරිත භූමියක් පුරා විහිදී ඇති මෙම සත්වෝද්යානය, විවිධ ක්ෂීරපායින්, පක්ෂීන්, උරගයින්, උභයජීවීන් සහ ජලජ ජීවීන් රැසකගේ නිවහනක් වන අතර, වනජීවී සංරක්ෂණය, සංරක්ෂණ අභිජනනය, විද්යාත්මක පර්යේෂණ, සත්ව සුබසාධනය සහ පාරිසරික අධ්යාපනය වෙනුවෙන් දශක නවයකට ආසන්න කාලයක් පුරා සුවිශේෂී සේවාවක් ඉටු කර ඇත.
සත්ව ප්රදර්ශනවලට අමතරව මින්මැදුර, සමනල උයන සහ විවිධ පාරිසරික දැනුවත් කිරීමේ වැඩසටහන් හරහා නරඹන්නන්ට අධ්යාපනික හා විනෝදාත්මක අත්දැකීම් ද ලබාදෙන දෙහිවල ජාතික සත්වෝද්යානයේ 90 වැනි සංවත්සරය නිමිත්තෙන් සංවිධානය කර ඇති විශේෂ වැඩසටහන් සඳහා සහභාගී වන ලෙස ජාතික සත්වෝද්යාන දෙපාර්තමේන්තුව දේශීය හා විදේශීය සංචාරකයන්ට ආරාධනා කර සිටියි.
