මුදල් විශුද්ධිකරණය වැළැක්වීමේ පනත යටතේ හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂට එරෙහිව නීතිපතිවරයා විසින් ඉදිරිපත් කළ නඩුව අද කොළඹ මහාධිකරණය හමුවේ යළි විභාගයට ගත් අතර එහිදී සී.එස්.එන් රූපවාහිනී නාලිකාවේ නාලිකා ප්රධානී වශයෙන් කටයුතු කළ යසාරා අබේනායක කියා සිටියේ තමා සහ විත්තිකාර යෝෂිත රාජපක්ෂ අතර ප්රේම සම්බන්ධයක් පැවැති බවත් විවාහයෙන් අනතුරුව ප්රශ්නගත නිවස වෙත පදිංචියට එන්නට සැලසුම් කළ බවත් ය.
කොළඹ මහාධිකරණ විනිසුරු උදේශ් රණතුංග ඉදිරියේ පසුගිය 9 වෙනිදා මෙම නඩුව විභාගයට ගත් අතර එහිදී රජයේ නියෝජ්ය සොලිසිටර් ජෙනරාල් ජනක බණ්ඩාරගේ මෙහෙයවීම යටතේ සාක්ෂි දුන් යසාරා අබේනායක කියාසිටියේ තමා සහ විත්තිකාර යෝෂිත රාජපක්ෂ අතර ප්රේම සම්බන්ධයක් පැවැති බවත් එම සම්බන්ධය බිදී ගිය බවත් මෙම නඩුවට පාදක වන දෙහිවල, මිහිදු මාවතේ පිහිටි නිවසට තමන් නිතර ගිය බවත් ගේ හදන කාලයේ යෝෂිත නාවික හමුදාවේ සේවය කළ බවත් ය.
මෙම නඩුවේ සාක්ෂි ලබාදුන් රත්මලාන ප්රදේශයේ පදිංචි ලූෂන් රත්නායක ප්රකාශ කළේ රත්මලාන, කෙකටිය පාරේ පිහිටි තම ඉඩමක් විකිණීමට සූදානම් වු බවත් එම පර්චස් 31ක් පමණ විශාල ඉඩම විකිණීමේ කාර්යය හිතවතෙකු වන වසන්ත කුමාර ජයසූරිය වෙත පැවරූ බවත් ය.
‘ඔහු ගැනුම්කරුවෙක් අරං ආවා. ඒ ගැනුම්කරු කවුද කියලා කිව්වේ නෑ’ යනුවෙන් ප්රකාශ කළ සාක්ෂිකරු සිනාසී ඇති අතර එහිදී නියෝජ්ය සොලිසිටර් ජෙනරාල්වරයා විමසා ඇත්තේ ‘ඇයි ඔබ හිනාවෙන්නේ. ඔබ ඇහැව්වේ නැත්ද ඉඩම ගන්නේ කව්ද කියලා’ යනුවෙන් විමසා ඇත. ඊට සිනාසෙමින් පිළිතුරු දුන් සාක්ෂිකරු ප්රකාශ කර ඇත්තේ තමන් එය ඇසුවේ නැති බවයි.
