ගෘහස්ත පරිභෝජනයට අමතරව බියර්, සත්ත්ව ආහාර සහ වෙනත් අගය එකතු කළ නිෂ්පාදන සඳහා ද දේශීය සහල් යොදා ගැනීමට රජය තීරණය කර ඇත.
ජනාධිපති අනුර කුමාර දිසානායක මහතා මේ බව ප්‍රකාශ කළේ ඊයේ පැවැති අනුරාධපුර උතුර ජල සම්පාදන ව්‍යාපෘතියේ දෙවන අදියර විවෘත කිරීමේ උත්සවයට එක්වෙමිනි.
ආහාර නොවන නිෂ්පාදන සඳහා සහල් භාවිත කිරීම මීට පෙර තහනම් කර තිබූ ගැසට් නිවේදනය රජය විසින් ඉවත් කර ඇති බව ද ජනාධිපතිවරයා මෙහිදී සඳහන් කළේය.
විශේෂයෙන්ම අතිරික්ත වී අස්වැන්නක් පවතින කාලවල දී ගොවීන්ට වඩා හොඳ මිලක් ලබා දී තරඟකාරී වෙළෙඳපොළක් නිර්මාණය කිරීමට මෙන්ම සහල් ආශ්‍රිතව නිපදවා ඇති බිස්කට්, කේක් සහ බියර් වැනි නිෂ්පාදන වාණිජමය වශයෙන් වෙළෙඳපොළට හඳුන්වා දීමට ද රජය සැලසුම් කරයි.
මෙහි ප්‍රතිඵලයක් ලෙස සහල් මෝල් හිමියන් සතු ඒකාධිකාරය අවම වී, වෙළෙඳපොළට වැඩි ගැනුම්කරුවන් පිරිසක් පැමිණෙනු ඇතැයි ද, එමඟින් අවසාන ප්‍රතිලාභය ගොවියාට හිමිවන බව ද ජනාධිපතිවරයා වැඩිදුරටත් කියා සිටියේ ය.
