පසුගිය ජූලි 22 වෙනිදා අධිකරණ සේවා සංගමය අධිකරණ අමාත්‍යවරයා වෙත ලිපියක් ලියමින්, විනිසුරුවරුන්ගේ විශ්‍රාම වයස දීර්ඝ කිරීම සඳහා ගෙනඑන්නට නියමිත ව්‍යවස්ථා සංශෝධනයට තම සංගමය එකඟ නැති බව නැවතත් අවධාරණය කර ඇත.
මහේස්ත්‍රාත්වරුන් හා දිසා අධිකරණ විනිසුරුවරුන් සාමාජිකත්වය දරන අධිකරණ විනිසුරුවරුන්ගේ විශාලතම සංගමය මෙසේ අධිකරණ අමාත්‍ය හර්ෂණ නානායක්කාර වෙත ලිපියක් යවමින් ප්‍රකාශ කරන්නේ, පෙර දිනකදී තම සංගමය රහස් ඡන්දයක් පවත්වා ගත් ඒකමතික තීරණය අනුව, විනිසුරුවරුන්ගේ විශ්‍රාම වයස දීර්ඝ කිරීමට එකඟ නැති බව ජනාධිපතිවරයාට ලිපියකින් දන්වා යැවූ බවයි.
කැබිනට් මණ්ඩලය විසින් මෙම නීති සංශෝධනය පිළිබඳ නිරීක්ෂණ ඉදිරිපත් කිරීමට අධිකරණ අමාත්‍යාංශය වෙත යොමු කරනු ලැබ ඇති නිසා තම තීරණය මෙසේ අමාත්‍යවරයාට ද දැන් වූ බව එම ලිපිය ප්‍රකාශ කරයි.
