මොරටුවේ වඩු කර්මාන්තයේ නිරත සමහර අය හවස හයේ සිට උදේ හය දක්වා වැඩ කරන බවත්, ඔවුන්ට වැටුප් නොගෙවා වේතනය වෙනුවට ලබා දෙන්නේ අයිස් පැකට් එකක් බවත් ප්රකාශ කරන අධිකරණ අමාත්ය හර්ෂණ නානායක්කාර මහතා අවධාරණය කරන්නේ මෙවැනි සමාජයක් වෙනස් කිරීම නීතියෙන් පමණක් කළ නොහැකි බවයි.
පසුගිය දෙවැනිදා හවස උත්සවයකින් පසුව මාධ්ය අමතා අදහස් දැක්වූ අමාත්යවරයා වැඩිදුරටත් ප්රකාශ කළේ, තම රජය නීතිය හරහා මත්ද්රව්ය සැපයුම නවත්වන්නට අවශ්ය පියවර ගනිමින් සිටින බවයි. එහෙත් මත්ද්රව්ය වෙනුවෙන් පවතින සමාජීය ඉල්ලුම නතර කර ගැනීම අත්යවශ්ය බවත්, ඒ සඳහා අවශ්ය සමාජ ක්රියාකාරිත්වය සමගින් ගත යුතු සියලුම පියවර ගනිමින් සිටින බවත් ඒ මහතා ප්රකාශ කළේය.
මේ ගෙවෙන්නේ අසීරු පරිවර්තනීය කාල පරිච්ඡේදයක් බව ප්රකාශ කළ අමාත්යවරයා වැඩිදුරටත් සඳහන් කළේ මහර ඇතිවූ සිදුවීම මීගමුව බන්ධනාගාරයේ සිදුවීම මෙන් නොවන බවයි. එනිසා මෙය සංවිධානාත්මකව එළියේ සිට මෙහෙයවන්නක් දැයි සැකයක් පවතින බවද අමාත්යවරයා ප්රකාශ කළේය.
මෙම සිදුවීම්වලට සිරමැදිරි තුළ පවතින තදබදය එක හේතුවක් පමණක් බව ප්රකාශ කළ අමාත්යවරයා කියා සිටියේ තදබදය අවම කිරීම සඳහා ආණ්ඩුව මේ වනවිටත් ක්රියාමාර්ග ගෙන ඇති බවයි. 2022 වර්ෂයේදී සංශෝධනය කරනු ලැබූ විෂ වර්ග, අබිං සහ මත්ද්රව්ය පනතට නැවත සංශෝධනයක් ගෙන එන බවත්, ඒ අනුව අත්අඩංගුවට ගන්නා මත්ද්රව්යවල දළ බර ග්රෑම් 100 ට වඩා අඩු නම් මහාධිකරණයෙන් ඇප ලබා ගැනීමට හැකිවන බවත් ඔහු වැඩිදුරටත් ප්රකාශ කළේය.
