අල්ලස් හෝ දූෂණ චෝදනා විමර්ශන කොමිෂන් සභාව හමුවේ පෙනී සිටින ලෙස කළ දැනුම්දීම පැහැර හැරීම හේතුවෙන් යැයි මාධ්‍යයට ප්‍රකාශ කරමින්, මාධ්‍ය ද සමඟ පාර්ලිමේන්තු මන්ත්‍රී රවී කරුණානායක මහතාගේ නිවස වෙත අල්ලස් කොමිසමේ නිලධාරීන් කණ්ඩායමක් අද (29) පැමිණ ඇත.
මේ පිළිබඳව රවී කරුණානායක මහතාගේ පාර්ශ්වයෙන් විමසීමක් කළ අතර, එහිදී ඔහුගේ ප්‍රකාශකයෙකු සඳහන් කළේ මන්ත්‍රීවරයා කිසිසේත්ම අල්ලස් කොමිසම මඟහැරීමක් සිදුකර නොමැති බවයි.
විමර්ශනයකට අදාළව අල්ලස් කොමිසම හමුවේ පෙනී සිටින ලෙස මන්ත්‍රීවරයාට දැනුම්දීමක් කර තිබුණ ද, අදාළ දිනයේදී මන්ත්‍රීවරයාට කොමිසමට පැමිණීමට නොහැකි බැවින් නීතිඥයන් හරහා වෙනත් දිනයක් ඉල්ලා ඇති බවත්, එලෙස නව දිනයක් ලබාදීමට අල්ලස් කොමිසම එකඟ වී ඇති බවත් අදාළ පාර්ශ්වය පැවසීය.
අල්ලස් කොමිසමේ නිලධාරීන් මෙලෙස නිවසට පැමිණ ඇත්තේ එවැනි තත්ත්වයක් යටතේ බව ද එම ප්‍රකාශකයා වැඩිදුරටත් පැවසීය.
