අධිකරණයේ ස්වාධීනත්වයට බලපෑම් කළ හැකි ප්‍රජාතන්ත්‍ර විරෝධී 22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත සහ අධිකරණ සංවිධාන සංශෝධන පනත් කෙටුම්පත දෙවන වර කියවීමේ පාර්ලිමේන්තු විවාදය අද (24) ආරම්භ කිරීමට නියමිතව ඇත.
මෙම පනත් කෙටුම්පත් දෙක සම්බන්ධයෙන් ශ්‍රේෂ්ඨාධිකරණයේ තීරණය පසුගිය දා කථානායක වෛද්‍ය ජගත් වික්‍රමරත්න පාර්ලිමේන්තුවට ඉදිරිපත් කළ අතර එහිදී ඔහු ප්‍රකාශ කළේ 22වන ආණ්ඩුක්‍රම ව්‍යවස්ථා සංශෝධන පනත් කෙටුම්පත සම්මත කිරීම සඳහා ජනමත විචාරණයක් අවශ්‍ය නොවන බවත්, ඊට පාර්ලිමේන්තුවේ තුනෙන් දෙකක විශේෂ බහුතර‍යක් පමණක් ප්‍රමාණවත් බවත් ය.
එලෙසම අධිකරණ සංවිධාන සංශෝධන පනත් කෙටුම්පත සරල බහුතරයකින් සම්මත කළ හැකි බවට ශ්‍රේෂ්ඨාධිකරණය තීරණය කර ඇති බවත් ඔහු එහිදී ප්‍රකාශ කළේය. ඒ අනුව අද (24) සහ හෙට (25) දිනයේ මෙම ව්‍යවස්ථා සංශෝධනයට සහ පනත් කෙටුම්පතට අදාළ විවාදය පැවැත්වෙන අතර, හෙට පස්වරුවේ ඡන්දය විමසා සම්මත කරගන්නට නියමිතය.
මෙම ව්‍යවස්ථා සංශෝධනයට ශ්‍රී ලංකා නීතිඥ සංගමය, විනිසුරු සංගම් ඇතුලු පුලුල්ව නීති ප්‍රජාව සිය විරෝධය දැක්වූ අතර විපක්ෂයේ දේශපාලන පක්ෂ බහුතරය ද මෙම ව්‍යවස්ථා සංශෝධනයට සිය විරෝධය දක්වා ඇත.
මේ අතර මෙම ව්‍යවස්ථා සංශෝධනයට විරෝධය දක්වා අද දින සජබ විසින් පොල්දූව හන්දියේ විරෝධතාවයක් සංවිධානය කර ඇත.
